МИЧА НЫВЪЯС, ЗБОДЕР ЗОНЪЯС

Рытъя уджсӧ ладитісны,
Вурисны да гладитісны,
Кыті колӧ баситісны,
Вом дорнысӧ краситісны

Ок дай мича нывъяс,
Ок дай небыд сывъяс.

Юрсинысӧ лӧсьӧдісны,
Сьӧлӧмнысӧ пӧсьӧдісны,
Косъяснысӧ зэлӧдісны,
Йӧктанінӧ шелӧдісны

Ок дай мича нывъяс,
Ок дай небыд сывъяс.

Турун жугйысь пыркӧдчисны,
Кильчӧ вылын ыркӧдчисны,
Мыссян дозйӧн гольӧдчисны,
Шыльӧдчисны-мольӧдчисны

Ок дай збодер зонъяс,
Сё зӧлӧта донъяс.

Кӧнӧсь нывъяс — туялісны,
Зептӧ кампет сюялісны,
Гудӧкнысӧ сывйыштісны,
Йӧктанінӧ лыйыштісны

Ок дай збодер зонъяс,
Сё зӧлӧта донъяс.

Йӧктанінын бергалӧны
Коді кыдзи, коді кӧні.
Кор нӧ сэсся, он кӧ ӧні?
Мед и ёна гажӧдчӧны

Ок дай мича нывъяс,
Ок дай збодер зонъяс.