ЭСКӦМ

Ме челядьлӧн синъяслы эска —
Оз вермыны пӧръясьны найӧ,
Кыдз бипур, кор сирӧдысь пестан,
Оз чискы, а юкталӧ чайӧн.

Ме эска и туйвывса билы,
Кӧть тыдыштӧ сійӧ виж чутӧн.
Ме эска и мортыслӧн килы,
Код черсӧ и пиласӧ кутӧ.

И чужӧмӧ поздысьӧм чукыр,
Ме чайта, оз некор жӧ ылӧд.
И ёльлӧн, и юыслӧн чукыль
Оз бокиӧ кытчӧкӧ кылӧд.

Ме эска и мӧвпалысь мортлы,
Код йӧз вӧсна тӧждлунӧн олӧ,
Код ме моз жӧ эскӧ, мый гортын
Эм ставыс, мый лолыдлы колӧ.

Код челядьӧс мусаӧн шуӧ,
Код кывзӧ, мый висьталӧ пӧчӧ,
Код некор оз кырымась пуӧ
И йӧралы петля оз вӧчав.

Ме эска, ме эска став бурас,
И эскӧмӧй некор оз кӧдзав.
И кытчӧдз оз пӧлыньтчы юрӧй,
Ме бурӧс жӧ йӧзыслы вӧча.