ЧӦСКЫД ӦМИДЗ

Тэрмасьтӧг, меліа          

Чӧскыд ӧмидзсӧ быдӧн вотӧ,
Шома ыжмансӧ — некод оз.
Сӧмын тэ вӧсна сьӧлӧм потӧ,
Кытчӧ саялін шонді моз?

Вала туй бокын пӧлӧзнича
Лӧзӧн вӧлі да лоис блед.
Кодлы эськӧ нӧ асьтӧ видзан?
Эз жӧ ылӧдны тэнӧ мед.

Ю дор пӧлӧнсӧ йиӧн дорис,
Кӧть и кӧдзавліс ӧти лун.
Пасьтӧм кыдз улас эськӧ корин,
Да ӧд, буракӧ, ог нин мун.

Гӧгӧр еджыд, а синмӧс сотӧ
Кынмӧм пелысьлӧн биа роз.
Чӧскыд ӧмидзсӧ быдӧн вотӧ,
Шома ыжмансӧ — некод оз.