ТОМ БАЯР

Уна пелыса, еджыд паруса
Юсӧ поткӧдӧ пыж ли сар.
Войвыв саридзӧ тырмидз арӧса
Туйсӧ кутӧма том баяр.

Паськыд морӧссӧ тӧвлы восьтӧма
Коми пармаын чужӧм зон.
Удал ёртъясӧс аскӧд босьтӧма,
Сынысь-бӧжалысь ёнсьыс-ён.

Ыджыд гыяслань збойяс мунӧны,
Найӧс чуксалӧ ылі му.
Абу пӧльяслӧн сямыс вунӧма,
Эм на сьӧлӧмын налӧн ру.

Мед и саридзас лючки воласны,
Лоӧ прӧмысӧн пыжныс тыр.
Мед и мусаяс гортын оласны,
Енлысь кевмасны бурсӧ пыр.

Мед и лӧсьыда гортӧ воасны,
Лёкыс некодӧс мед оз су.
Мед жӧ баяръяс нэмсӧ лоасны,
Нэмсӧ нималас чужан му.