ВӦЛІ ОЛӦМ

А ёна жӧ и лӧсьыд вӧлі олӧм —
Пласьт усьмӧн ю да асылӧдзыс сьыв.
А мый тэд мыйкӧ тӧлкӧн вӧчны колӧ,
Он весиг пельнад лапнитлы ни кыв.

Ас чужан муын вӧлім быттьӧ бесъяс
(Ме чайта, тайӧ кывйыс лоӧ стӧч).
Кор шойна вылын пӧрласисны крестъяс,
Эз некод лэпты либӧ выльӧс вӧч.

И нитшсялісны вевтъяс керка вылын,
И некод гидын баксысьыс эз ло.
И вӧрыд лои быттьӧ вӧчтӧм тыла,
И муяс вылын нинӧмыс оз во.

А ӧні таысь вочавидзны колӧ,
Но некод кывсӧ босьтысьыс оз сюр.
Ок, олӧм, олӧм, курыд жӧ тэ, олӧм,
Кор нитшка либӧ пилипызя юр.