ЕНМА ВО

Ог мыжав тэнӧ нинӧмысь, важ воӧй,
Кӧть мен и йӧзлы вайин уна лёк.
Ме эска ёна: аски бурджык лоӧ,
Ме чайта: гундыр власьт дорӧ оз лок.

Оз вермы лоны, медым выжыв босьтіс
Да некод нинӧм чуйдыны эз куж.
Оз вермы лоны, медым гӧгӧр косьтіс
Да ӧти кӧйдыс весигтӧ эз чуж.

Оз вермы лоны, медым Эжва юын
Да ӧти чери некор нин эз ло.
Оз вермы лоны, медым Коми муын
Да коми мортыс ыджыдӧдз эз во.

Вай, дона йӧзӧй, мичаджыкӧн лоӧй,
Ӧд абу олӧм, пемдӧма кӧ лов.
Выль воӧй, ыджыд лача кутан воӧй,
Вай лок да, Енмӧн кора, Енмӧн ов.