ЧУКСАЛӦМ

Шодліс тан Новгородса ушкуйник,
Скандинавия муысь варяг.
Вирӧн ойдӧма прӧйдитӧм туйным,
Чудьлӧн гуясӧн тырӧма яг.

Ӧні шуӧны, ӧтув мый олім.
Воча шуа ме: сёрниыс лӧж!
Локтӧм йӧзысь ми биысь моз полім,
Ставсӧ терпитім олӧмным чӧж.

Чужан муаным лагеръяс тырыс,
Мунӧ бокиӧ из шом и газ.
Мича ягъясысь пожӧмным бырис,
Весиг сёрниным абу нин ас.

Тадзи водзӧсӧ позьӧ мӧй овны?
Медым кылінныд, шуа ме: оз!
Тырмас гортаным кодыськӧ повны,
Овны гуясын шырпиян моз.

Абу ньӧти ме рочьяслы паныд,
И еврейясыс оласны мед.
Но кӧзяиныс ачым ме тані,
Водзӧ урсасьны гортын ог сет.

Вай жӧ кыпалам, комияс, лолӧн,
Вежавидзим ми вывті нин дыр.
Сідзи лӧсьӧдам Комиын олӧм,
Медым му вылысь вужным эз быр.