ВОЙНАДЫРСЯ ЧЕЛЯДЬЛӦН СЬЫЛАНКЫВ

Эн вунӧд тэ, Рӧдина, шуны,
Победасӧ нимӧдан кор,
Мый ковмис и челядьлы нуны
Став сьӧкыдсӧ синвакӧд сор.
Эн вунӧд тэ, Рӧдина, шуны,
Победасӧ нимӧдан кор.

Ми асьнымӧс зумыдӧн чайтім,
Кӧть чорзьытӧм вӧлі на гӧч,
Да вӧчим дас витӧн, дас квайтӧн,
Мый ыджыдыс ӧні оз вӧч.
Ми асьнымӧс зумыдӧн чайтім,
Кӧть чорзьытӧм вӧлі на гӧч.

Ми гӧрим и кӧдзим, и чӧвтім,
И тшупсим, и пӧрӧдім кер.
Кӧть тшыгъялім, некор эг лӧвтӧй,
А синватӧ мыськавліс зэр.
Ми гӧрим и кӧдзим, и чӧвтім,
И тшупсим, и пӧрӧдім кер.

Ми сійӧн и регыдик олам,
Мый сэки эг жалитлӧй вын.
Но, ковмас кӧ, кыпалам лолӧн
Да вӧчам на норма дай джын.
Ми сійӧн и регыдик олам,
Мый сэки эг жалитлӧй вын.

Эн вунӧд тэ, Рӧдина, шуны,
Победасӧ нимӧдан кор,
Мый ковмис и челядьлы нуны
Став сьӧкыдсӧ синвакӧд сор.
Эн вунӧд тэ, Рӧдина, шуны,
Победасӧ нимӧдан кор.