ПЕТРОВНАГажтӧм эськӧ вӧлі овны, Эз кӧ быттьӧ орччӧн ов, Йӧзлы — Наста, мен — Петровна — Мича морт да сӧстӧм лов. Чечча, кильчӧ вылӧ пета — Сійӧ чышкӧма нин йӧр, Ветлӧма нин вӧльнӧй светас, Гортлань веськӧдчӧма бӧр. «Дыр жӧ узян, — меным шуӧ, — Дышыд сёйӧ али мый? Мый нӧ челядьыдлы пуан, Он кӧ асывсяньыс кый?» Сылы сёрнитыштны колӧ, Сійӧн кесйӧдыштӧ, дерт. Ачыс аддзӧ: водз жӧ ола, Оз жӧ дарӧвӧйыс верд. Ӧтнас ӧні дзик Петровна, Кӧть и вӧлісны ныв-пи. Мунлісны тай йӧзӧ овны, Кӧнкӧ бокын кутны би. Пыр колхозад ытшкис-гӧрис, Коркӧ шойччыліс ли эз, Но ӧд век на ачыс вӧрӧ, Вайӧ ва и пыртӧ пес. «Вай ме отсышта кӧть», — шула, Вочавидзас: «Оз на ков. Дзебышт менӧ, мыйӧн кула, Места вылад лоӧ лов». Кыла Наста тьӧтлысь гӧлӧс — Скӧр кӧ вӧлі, лоа рам. Дзик жӧ татшӧм коркӧ вӧлі Менам муса ыджыд мам.
