КОЛИП

Асывсянь колипыс ен югыд ывлаас сьылӧ,
Сьӧлӧмас шондітӧг некоді медым эз коль.
Ичӧтик ачыс, а майбырӧй, кутшӧма кылӧ —
Быттьӧкӧ енэжас ӧшйӧма тільгуна ёль.

Сьылысьсӧ кывзам да надзӧник кыпалам лолӧн,
Йӧктас и сьылас на шондіӧн югдӧдӧм йӧр.
Пармаса му вылын асланым мывкыдӧн олам,
Тӧвнас кӧть ыркавлам, тулыснас шоналам бӧр.

Тувсовъя енэжӧд кельӧбӧн гӧгралысь горыс
Ягъясӧ, расъясӧ, сьӧртъясӧ поздысяс пыр.
Льӧм войта берегӧ колипыс нэмсӧ на корас,
Дзоридза эрдъясысь сьылӧмным некор оз быр.