БЫТТЬӦ СІДЗИ-Й КОЛӦ...

Быттьӧ сідзи-й колӧ,
Ызгӧ-бузгӧ шор.
Кынмӧмысь кӧть полӧ,
Петӧма нин кор.

Быттьӧ сідзи-й колӧ,
Енэж лӧз да сӧдз.
Бура дыр нин олӧ
Мудӧд вылын пӧч.

Быттьӧ сідзи-й колӧ,
Юргӧ сьыланкыв.
Пывсян горъя лолӧн
Ветлӧдлӧ том ныв.

Быттьӧ сідзи-й колӧ,
Абу ун ни вӧт.
Коді кытчӧ волӧ,
Тӧдӧ да оз тӧд.

Быттьӧ сідзи-й колӧ,
Дзоридзалӧ льӧм.
Кӧть и завидь лолӧ,
Век на висьтасьтӧм.

Быттьӧ сідзи-й колӧ,
Сетан, а он кор.
Лӧсьыд жӧ тэ, олӧм,
Гӧгӧр ловзьӧ кор.