ЯГЫН

Дзик ведра тырыс тшак, и ягас — мыйта колӧ,
Но сюрис лӧсьыд мыр и сиктӧ мунны дыш.
Тан шойччӧ пыктӧм юр, тан колипасьӧ лолӧй,
А сэні — зык да вен, а сэні — пинь да гыж.

Тан куран ныра сизь оз балябӧжӧс розьӧд,
И, эм кӧ быттьӧ ош, оз песовт менсьым юр.
И тані, сӧмын тан и вунӧдлыны позьӧ,
Мый абу ставыс лёк, а эмышт на и бур.

И ог на ёна пов, кӧть деливӧ нин лолӧ,
Мый коркӧ петас лов, и вӧрас ог нин мун.
А медым эськӧ тан и эштас коркӧ олӧм,
А медым эськӧ тан и босьтас помтӧм ун.