ПУКТЫСЯНІНСЯНЬ

Мудзӧма жӧ, буракӧ, и вӧв:
Кутшӧм рӧдтӧм? — ӧдва-ӧдва легӧ.
Дзуртӧ важӧн мавтлытӧм телега,
Быттьӧ луныс сылы эз нин вӧв.

Позьӧ вӧвлы вачкыштлыны, дерт,
Сӧмын жаль — кыдз пӧсялӧма бокыс.
Менам мышкӧ ляснитчӧма вокӧй —
Эз жӧ ном да гебйӧс сӧмын верд.

Мен — дас вит, а сылы тырис дас,
Миян мам эм, ытшкыны на кольччис.
Оз и аддзыв верӧстӧгыд шойччӧм,
Мыйӧн быдмам, шойччӧдам на, час.

Но а талун ломтам пывсян гор,
Медым лэдзлас вой кежлас кӧть мудзыс,
Медым мамным чӧскыда зэв узяс,
Асьсӧ босьтны Енсӧ оз на кор.

Гожся рӧмыд — пӧим кодь жӧ дзик,
Рудӧдӧма весиг юрйыв кодзув,
Сӧмын югдӧ менам синъяс водзын —
Эрдӧн воссьӧ чукыль сайын сикт.