ШАНЬ ЙӦЗ

— Морт локтӧ, вӧрсӧ пӧрӧдас, дача керка кыпӧдас, карнытӧ пузувтас, олӧмнытӧ босьтас! — горзіс шонді водзӧ петӧм кодзувкотъяслы тӧв нырӧн важӧнкодь нин шӧрипӧв чегӧм да сьӧдӧдӧм пожӧм вывсянь нимлун сёян лун кежлӧ моз сьӧда-еджыда платтьӧӧн вӧччӧм лэчыд гӧлӧса Катша, коді быдтор медводз тӧдлӧ да аддзӧ. — Мӧдар туй бокас вуджӧй. Сэтысь ягсӧ оз на кӧсйыны вӧрзьӧдны. Ачым тӧрыт кывлі. Тэрмасьӧй, тэрмасьӧй!

— Кытчӧ нӧ та ыджда семьянас да та мында посни челядьнас вӧрзьӧдчан? — шыасис воча шог гӧлӧсӧн Кодзувкот бать. — Туй бокас моз ми да, гашкӧ, оз жугӧдны керканымӧс, зэв уна вын стрӧитчигас лои пуктӧма да...

— Эн шу тадзтӧ, пиӧ, — китшнитіс Катша. — Тэрмасьыштан кӧ, шондісӧ аддзывны на кутан, а он кӧ — пычнитасны. Со мыйта гӧгӧр вӧр-васӧ пузувтісны, керка-короминаяс лэптісны. Эз бара юавны тэнсьыд да менсьым.

Збыльысь, бура важӧн нин босьтчисны пӧрӧдны татысь вӧрсӧ. Ёна нин лӧз тшынӧн сьӧласьысь бензопилаяс сывтыръя пуяссӧ и чаль кызтасӧ кок йывсьыныс уськӧдісны. Нёльнан боксяньыс вӧр дісӧ вильӧдісны. Ичӧтик керкаяс кӧнсюрӧ кыпӧдісны. Кодсюрӧ картупель нин быдтіс мыръяс йӧткалӧм бӧрын артмӧм му вылын. Кодзувкоткара участокыс и колис. Мыйлакӧ кӧзяиныс мукӧдъяс моз эз уськӧдчы, а матыстчис сӧмын талун.

Кодзувкот Катшатӧг тӧдіс, мый колӧ пышйыны, но кытчӧ? Батьыс, коді кувсьыліс нин, висьтавліс, мый мӧдар ягыс, кытчӧ сійӧ ветлӧма, кор тані туйыс эз на вӧв, сёянӧн гӧльджык да и местаыс увтасінынджык, ыркыдджык таладор сертиыс. Тайӧ, дерт, эськӧ эз сувтӧд Кодзувкотӧс, да туйсӧ вуджны некыдзи: лун и вой журъялӧны сэті машинаяс. Таляласны да бус весиг оз коль. Мӧдарӧ кӧ быттьӧ мунны — ю веськалӧ. Он жӧ вермы вуджны. А кык мӧдар бокас — муяс да муяс, пу ни палич абу.

Со мый вӧсна шог вӧлі Кодзувкотлы, со мый вӧсна сійӧ шуис Катшалы, мый надейтчӧ бур морт вылӧ, коді оз пузувт налысь оланінсӧ.

Збыльысь бур морт и веськаліс.

— Кодзувкоткар тай участок пельӧсаным, пиӧ, — шуис сійӧ ассьыс неуна ичӧтджык мортлы. — Ог, буди, жугӧдӧй. Мед олӧны, ог пӧрӧдӧй да, пашкыр лапъяса пожӧма-коз улас. Уна места тай оз босьтны. Да и керка дорным пуяснас гажаджык лоӧ. Ӧти войт, кӧнкӧ, зэригад оз письт, кужӧмаӧсь местасӧ бӧрйыны. Сёяныс туйбокса вӧрсьыс налы сюрас на-й.

— Ме тадзи жӧ чайта, батьӧ, — шуис ичӧтджыкыс. — Гагъястӧ пӧ му вылад кодзувкотъясыд оз лэдзны-и.

— Йӧр вӧчышт, пиӧ, мед оз тальыштчыны. Дыр на тэныд да меным тані ковмас муркӧдчыны.

— Катшаыд катша и эм. Сэтшӧм ёна повзьӧдіс, а со кутшӧм шань йӧз веськалісны, — мӧвпаліс Кодзувкот да тшӧктіс сайӧдчыштлыны ныв-писӧ ая-пиалӧн уджалігкості, мед кок уланыс не веськавны. Лӧнясны да сэки позьӧ котравны.