КЫТЧӦ ПУКТІН, СЭТЫСЬ И БОСЬТ

Вом йизьытӧдзыс исласьӧм бӧрын пырис гортас ичӧтик Колюк да лымсӧ пыркӧдтӧг и чужъяліс лабич улӧ гын сапӧгъяссӧ. Вазьӧм вурун кепысьяссӧ сэтчӧ жӧ шыбитіс. Мамыс картаын идрасис да, некодлы вӧлі тшӧктыны, мед паччӧрӧ катӧдіс. Сідзи и эновтіс ки-кок шонтысьяссӧ.

Войнад кӧдзыд джоджад ыркыд босьтіс гын сапӧгъясӧс да кепысьясӧс. Гын сапӧг пӧв и шуис кепысьяслы:

— Вай жӧ паччӧрас кайлам. Идӧртӧм зонкаыд куш джоджас колис да, висьмыны вермам.

Шуис — и гын сапӧгъяс стен пӧлӧн кималасӧн паччӧрӧ кайисны. Кепысьяс на бӧрся. Ок и лӧсьыда колис налӧн войыс шоныд паччӧрад.

Югдігӧн гын сапӧгъяс да кепысьяс паччӧр вывсянь сёр вывті пӧлатьӧ вуджисны. Сэні важ кӧлуй сайӧ дзик нин пельӧсас дзебсисны. Видлы корсьны — он аддзы. Эз окота вӧв налы ызі-базі кодь зонкакӧд ывла вылӧ петны, мед кӧтасьӧм бӧрын бара кытчӧкӧ шыбитісны.

Садьмис ичӧт Коля. Окота лои мортыдлы бара ывла вылын шодлыштны. Кӧсйис кокъясас гын сапӧгъяс сюйны, а найӧ абуӧсь. Кепысьяс му пырыс жӧ мунӧмаӧсь. Быдлаысь корсис, некытысь эз сюрны.

— Мамӧ, менсьым гын сапӧгӧс да кепысьӧс эн аддзыв? — юаліс сійӧ медбӧрын пачводзын бергалысь мамыслысь.

— Эг, пиӧ. А кытчӧ нӧ эськӧ пуктылін?

— Лабич улӧ сюйлі.

— Лабич улӧ кӧ сюйлін — сэтысь и босьт. Он жӧ ӧд сэтчӧ коль. Паччӧр вылӧ коліс катӧдны, мед косьмисны. Ноко, сэтысь видлы. Гашкӧ, батьыд косьтыны пуктіс.

— Видлі нин. Сэні сӧмын тэнад гын сапӧгыд.

— Эз жӧ ӧд сыв. Бурджыка корсь.

Гӧгӧр лукйис Коля керка пытшкӧсысь, пӧлатьӧ весиг видзӧдліс, но нинӧм эз аддзы. Пыдіӧ пыравны дышӧдчис: код нӧ чайтас, мый пӧлать пельӧсӧ гын сапӧгъяс да кепысьяс дзебсисны?

Ёртъясыс шутьлявны кутісны, исласьны корисны, а корсянторъясыс быттьӧ пуалісны.

— Мамӧ, батьыд, гашкӧ, утъявны босьтіс гын сапӧгъяссӧ да кытчӧкӧ пуктіс? — юаліс мамыслысь.

— Выль кодь на вӧлі да, оз жӧ ӧд утъяв?..

— Мӧд гын сапӧг либӧ вайлы. Батьӧ пажнайтны локтас да висьталас, — корис мамыслысь Коля.

— Эм дзик выль гын сапӧг, школаад мунігкежлӧ ме сійӧс тэныд ньӧблі, да ог сет, — вочавидзис мамыс. — Менсьым, колӧкӧ, идрасян сапӧгӧс кӧмавлы. Исласьнытӧ шогмас.

— Мед сераласны? — забеднӧ лои Колялы.

Кывзісны-кывзісны мама-пиалысь сёрнисӧ гын сапӧгъяс да жаль лоис ичӧт кӧзяинныс. Петісны найӧ картон кӧрӧб сайысь да сёр вывсянь чеччыштісны джоджӧ. Топ-топ сӧмын кыліс. На бӧрся и кепысьяс шлёпнитчисны.

Бергӧдчис шыяс вылас Коля да аслас синъяслы оз эскы: гын сапӧгъяс «смирно» моз лабич кокъяс дорын сулалӧны, а кепысьяс лабич помӧ тӧрӧдчӧмаӧсь.

Ок и рад лои Коля, мый бара на исласьны удайтчас.

— Сюрис! Сюрис! — горзіс сійӧ керка пасьта, кӧть ачыс эз гӧгӧрво, кытысь-мый ки-кок шонтысьясыс лоисны. Гашкӧ, талун оз нин вунӧд найӧс паччӧр вылӧ катӧдны?