КОЛИПКАЙ
Батьыслӧн да мамыслӧн быдмӧ нывка, нимыс сылӧн Светлана, дженьыда кӧ, Света. Коймӧд ли нёльӧд классӧ котралӧ. Зэв на тай ичӧт-а. Мамыслы гортас ёна нин отсасьӧ: джоджтӧ чышкӧ, тасьті-паньтӧ мыськӧ, магазинад няньыдла котӧртлӧ.
Шуны верманныд, мый тадзтӧ быд шань нывка вӧчӧ. Но Света мукӧдсьыс торъялӧ. Торъялӧ сійӧн, мый сьылӧ. Мунӧ кытчӧкӧ — сьылӧ, локтӧ — сьылӧ, мыйкӧ вӧчӧ — сьылӧ.
Паськыд гажа улича, улича,
Доли-шели, ноли-шели, говоринскӧй улича, —
кылӧ Павел Гришалӧн, Света батьлӧн, керка дорын.
Уличаас ныв олӧ, ныв олӧ,
Доли-шели, ноли-шели, говоринскӧй ныв олӧ.
Водзӧ Света сьылӧ, мый ныв дорас зон волӧ. Но Света ичӧт на, и зонъяс сы дорӧ оз на волыны. Но зонкаяс тшӧкыда ӧшинь уланыс бергалӧны. Школаын, тӧдӧмысь, оз жӧ веськодя сы вылӧ видзӧдны. Кыдзи нӧ! Мичаник ачыс и сэтшӧм лӧсьыда сьылӧ. Бура велӧдчӧ-и.
Йӧз шензьӧны, кытысь татшӧм колипкайыс Павел Гришалы да Ӧндрей Марьялы, ӧд киӧ гудӧк оз босьтлыны ни вомсӧ весиг праздникъяс дырйи оз восьтлыны? Но ӧд ыджыд мамыс Светалӧн зэв сьылысь вӧлӧма. Петыр Анна вель нин пӧрысь да оз воддза мозыс ливкйӧдлы, но Светаӧс велӧдны вермӧ на. Сысянь нывкалӧн сьыланкыв дінӧ муслуныс. Мый ыджыд мамыс тӧдӧ да сьывлӧма, Света ставсӧ жӧ тӧдӧ да сьылӧ. И «Бур батькӧд-мамкӧд олӧмтӧ», и «Пукала кӧть ветлӧдлатӧ», и «Джуджыд керӧсын, гажа нӧрысынтӧ», и «Чужи-быдми сьӧд вӧр шӧрынтӧ» — дзик-дзик ставсӧ. Весиг ыджыд мамсьыс нин унджык тӧдӧ. Ӧнія коми сьыланкывъястӧ кывлас да здукӧн велӧдӧ. «Маръямольтӧ» сьылӧ — сьӧлӧмыд сьылӧ жӧ.
Школаын праздникъяс дырйи концертъяс петкӧдлӧны. Медся бур сьылысьыс, дерт, Света. Уна нин и козин вичмис сылы мичаа сьылӧмсьыс. Найӧс нывка медводз ыджыд мамыслы петкӧдлӧ.
— Со мый меным талун сетісны, — матыстчӧ сійӧ дона морт дінӧ да окыштӧ банбокас.
— Сьыв, сьыв, донаӧй, гажӧд бур йӧзсӧ, мед шаня оласны, — шуӧ пӧрысь морт.
Светаӧс бура тӧдӧны оз сӧмын сиктас, но и ставнас Эжва йылын, унаысь нин конкурсъяс вылад выступайтліс да, мукӧд сиктъясӧ воліс да. Гортӧдзныс культураса уджалысьяс волісны, бать-мам дорас. Нывкатӧ пӧ колӧ Сыктывкарӧ национальнӧй гимназияӧ сетны. Нӧшта на пӧ бурджыка сьывны велалас и школасӧ сэн помалас. Гашкӧ пӧ, Лидия Логинова кодь жӧ лоас да коркӧ став Коми мусӧ дай паськыдджыка гажӧдны кутас.
Светалы окота мунны карас велӧдчынысӧ и ӧтпырйӧ полӧ, ичӧт на да. Ыджыд мамтӧгыс, бать-мамтӧгыс да ёртъястӧгыс гажтӧм лоӧ.
Гожӧмнас тай сьылӧмыс ӧшинь улас кыліс на-а. Гашкӧ, арнас ичӧт колиплӧн сӧдз ёль кодь гӧлӧсыс кар весьтын нин лэбавны кутас да.
