БАТЬЛӦН ГӦЛӦС
Мунісны челядь вотчыны. Зэралыштӧм бӧрын посньыдик гӧрд гобйыс вель уна чепӧсйӧма. Ок и чӧскыд сійӧ картупель сорӧн жаритӧмнад, пиньяс улад мурчкакылӧ.
Регыд и тыртісны дозъяснысӧ. Чукӧртчисны бӧр гортаныс мунны, а Педӧр абу. Горзісны-горзісны, но весьшӧрӧ, некод эз шыась. Час коли, мӧд коли да вӧлисти лэччисны Керӧсысь гортаныс, мед висьтавны шог юӧр.
Унаысь кӧть нин вӧрын вӧлі, Педӧр вошӧмсӧ эз и тӧдлы. Копыртчылас гӧрд молодечла, пуктас чуманас, а синъяс улас мӧд нин усьӧ. Сідзи и шавксьӧдіс тшакъяс бӧрсяыс котӧрӧнмоз. Сувтны ӧдӧбӧн мунӧмсьыс да видзӧдлыны гӧгӧрбок гӧгӧрвоис сӧмын сэк, кор мыйлакӧ тшакъясыс друг быттьӧ кытчӧкӧ дзебсисны. Пеналӧ тэчӧм кольквиж карандаш кодь пожӧмъяса яг пыдди лоис турунвиж нитш подъя сук козъя егыр, коді ӧдва лэдзис Педӧр дорӧдз шонді югӧръяссӧ.
Нинӧм и дзебны, зонка повзис. Босьтчис горзыны, но некодарысь вочасӧ нинӧм эз кыв, сӧмын аслас гӧлӧсыс бӧр дзебсьыліс коз лапъяс улӧ. Лои забеднӧ, быдсӧн син доръясыс вазисны, а сэсся и тюрис бан бокӧдыс ыджыд пӧсь моль.
Вочасӧн сыркъялӧмӧдз воис Педӧр, но сэсся быттьӧ кыліс батьыслысь гӧлӧссӧ: «Тэ ӧд, пиӧ, ыджыд нин, нёльӧд классын нин велӧдчан да. Нолтӧ, дугды бӧрднытӧ да кывзы батьыслысь. Ме ӧд тэныд висьтавлі нин, мый Керӧс боксӧ пӧшти ставнас гӧгӧртӧ Кӧдзыд шор, коді сикт горуланым усьӧ миян Водз юӧ. Эн на кӧ вудж тайӧ шорсӧ, некытчӧ он вош. Мунан-мунан да, люкасян тайӧ шорас, лэччан ва горулыс да петан Йирвыв видз вылӧ, кысянь ачыд тӧдан, кыдз локны. Сӧмын ва паныдыс эн мун, ылыстчан гортысь. Дерт, шор пӧлӧныс лёк муннытӧ, гӧгӧр бадь да вутш, но мый вӧчан — быть ӧд петны колӧ. Он кӧ шор вылас веськав да лунвылӧджык босьтан, то катыдпомса важ тыла вылӧ петан. Сэсянь кужан жӧ локнытӧ. Эн пов. Он кӧ Кӧдзыд шорсӧ вудж, Керӧс ягад некытчӧ он вош. Сы вӧсна и ми, бать-мам, лэдзам ӧтнаныдтӧ сэні вотчыны. Вай шойччышт да мун кодарӧкӧ, кытчӧдз шондіыс эз саяв. Пемдас да гажтӧм лоӧ. Бур туй, пиӧ».
Сайкаліс батьыслӧн буркывйысь-велӧдӧмысь Педӧр. Збыль ӧд, батьыс висьтавліс нин, мый Керӧсын, кӧть и вошан, он вош, гортӧ быть локтан. Дерт, он кӧ вудж Кӧдзыд шорсӧ. Вуджан кӧ, чӧс туйяс заводитчӧны, ыджыд парма шыалӧ, кӧні вӧралысьяслӧн туйяс-ордымъяс. Позьӧ пӧ воӧдчывны перымсаяс ордӧдз. Батьыс шуӧ, быдмыштан пӧ да, и сылань нуӧдла.
Нӧшта дум вылас усис Педӧрлы, мый вошан кӧ, сӧмын ӧтарӧ колӧ мунны, коркӧ быть кытчӧкӧ воан, кутшӧмкӧ ордым, визирка ли параллель, кодъяс ӧтарӧ да мӧдарӧ пармасӧ юковтӧны, кодарӧкӧ петкӧдасны. Весиг вӧралысьлӧн чӧс туйыс вӧр керка дорӧ ли гортлань вайӧдас. Тадзи висьтавліс батьыс.
Шоналіс сьӧлӧмыс Педӧрлӧн, кокни весиг лолавны лоис. Чеччис нитшсялӧм колода вылысь, видзӧдліс гӧгӧр да видзӧдлассӧ лэптіс енэжлань. Нӧшта ӧд и шонді серти позьӧ тӧдмавны гортлань туйсӧ! Гортысь петігӧн шондіыс мышкӧ колис. Сідзкӧ, ӧні колӧ петны сылы воча, неуна шуйгавыв босьтӧмӧн, сы вӧсна мый шондіыс, рытыввывлань мунӧмӧн, сетчис веськыдвыв. Батьыс жӧ таӧ велӧдліс.
Куим верст бокӧ пыравлӧма Педӧр вотчанінсянь, сикт катыдса важ тыла горулӧ петіс. Бать-мамыс да сиктсаяс пӧвстысь кодсюрӧ лӧсьӧдчӧны вӧлі корсьны мунны, кор матыстчис ӧшинь улас.
— Кодарӧ нӧ петін? — юаліс батьыс.
— Тыла горулӧ, — вочавидзис Педӧр.
— Сідзкӧ, юрыд уджалӧ на, — нюммуніс батьыс. — Ме коркӧ ичӧт дырйи, вошлі жӧ да, сизим верст кытшовтлі.
