ӦЛЬӦКСАН — СУН-САН

Во дас сайын кымын тайӧ вӧлі. Гид тшупны кер вайи. Чинталі, кырсси да тшуптӧдз утъяс вылӧ тэчи. Мед неуна тӧлалыштас, косьмыштас.

Видзӧда мӧд луннас — керъястӧ менсьым кодкӧ муас бӧр быгльӧдлӧма. Кутшӧм код юра йӧй нӧ, мися, тадзсӧ пакӧститіс? Юалі суседлысь. Эг пӧ некодӧс аддзыв. Сідзи тӧдмавтӧг и колис.

Ӧти лунӧ босьтчи тшупсьыны да кык порсь вылӧ ичӧтик гидтӧ нёль судта, паз перйӧмӧн, лэпті. Лун куимӧн, мися, юрсӧ вӧчӧмӧн да мый да, эштас. Мӧд луннас асывсяньыс тшупсьыны эг вермы. Кытчӧкӧ тай могӧн ветлі-а. Локті гортӧ да синъясӧй паськалісны: кодкӧ подулӧдзыс керъястӧ разялӧма, кыдз веськалӧ разӧдӧма. Бура дыр нокси бӧр лӧсьӧдігас, вель уна кад вошті, ӧд керъясыс пасъявтӧмӧсь вӧліны. Тшупӧм бӧрас ӧд, нитш вылӧ лэптӧм водзвылын, пасъявлӧны.

Ёнакодь скӧрми. Кодлы нӧ, мися, ме лёксӧ вӧчи, ме вылын тадзисӧ тешитчӧ? Юрын вель уна йӧзӧс бергӧдлі, да некодӧс мыжавны эг лысьт. Киӧдыс кӧ эськӧ кутӧма.

Сійӧ лунас, бара жӧ могъяс вӧліны да, ӧти судта и тшупи. Сэсся пасъялі керъяссӧ. Мися, кодкӧ кӧ бара дурас, кӧть нин ӧдйӧджык бӧр позяс лӧсьӧдны. Но войнас некод абу матыстчылӧма — вит судтаыс сулаліс вӧрзьӧдлывтӧг.

Кӧсйи ӧти срубӧн ӧкмыс судта кымын и кыпӧдны, но керъяссӧ сьӧкыд лоис лэптавны да, выль сруб пані. Кык судта эштӧді да гортӧ пажнайтны пыри. Шойччигмоз час мында олі.

Петі да шӧйӧвоши: пасъялӧм срубйысь джын керйыс нин вӧлі муын. Вылыс кер вылын пукаліс суседлӧн ар сизима Сашаыс да зілис уськӧдны нӧшта ӧтиӧс.

Скӧрмыны эськӧ, а менӧ шемӧс босьтіс: этатшӧм дзоляник, а сы мында вын. Паськыд-ляпкыдъясыд тай ёнӧсь. Сойясыс, майбыр, кызіник потш кодьӧсь. Нинӧм, тыдалӧ, ичӧтыслы вӧчнысӧ да вильшасьӧ. Ме кӧ ичӧт дырйи татшӧм ёнӧн вӧлі, колӧкӧ, рази жӧ.

Эг и вид зонкасӧ. Мися, тадзтӧ оз позь лукавитны, сӧмын и шуи. Да Ӧльӧксан — Сун-Сан ним сылы сеті. Сизим арӧса нин да нӧшта татшӧм ён да, абу, дерт, Саша, а Ӧльӧксан. А мыйла Сун-Сан, ачым ог тӧд.

Ыджыд нин ӧні Ӧльӧксан, крепыд тэчаса ён морт. Корсюрӧ казьтыштла сруб разьӧмтӧ да синъяссӧ муӧ лэдзӧмӧн нюмъялӧ. Сідзкӧ, ставыс бур.