ТШАКЪЯС ДЗЕБСИСНЫ

— Дзебсьӧй! Толя локтӧ! — юӧртіс эрд пӧлӧн бырснитӧм тшакъяслы Катша, коді бура дыр нин пукаліс пожӧм вож вылын сиктлань банӧн.

Здук — и гобъяс быттьӧ эз и вӧвлыны еджыд яла вылас. Быть ӧд дзебсьы: лӧсьыда вотӧм пыдди тӧндзи волігас Толя кызвын тшаксӧ чужъяліс. Торпыригъясыс чер улысь чаг моз яг пасьталаыс ӧтарӧ-мӧдарӧ лэбисны. Торйӧн нин сюрис гут кулан да пон тшакъяслы. Мый эськӧ найӧ лёксӧ Толялы и вӧчисны?

Толя первойӧн вӧрас пырис. Мукӧд зонкаяс да нывкаяс сы бӧрся вӧліны. Но Толялы, кӧть мый дыра эз кытшлав, кӧть кытчӧдз эз ветлы, дзик нинӧм эз сюр, бӧрвылас локтысьяслӧн дозъясыс чукйӧн тырисны.

— Тэ нӧ кутшӧмкӧ пу улын узин али мый? — юалӧны сылысь ёртъясыс. — Куш тай нӧ ведраыд.

— Ни ӧти тшак абу да, — дорйысьӧ Толя.

— Кыдз нӧ абу, ставыслы сюрӧ да? — шензьӧны челядь. — Бурджыка корсь, эн шутьлялӧмӧн шлапъяв.

Дугдіс Толя шлапъялӧмысь, босьтчис сюсьджыка корсьны, весиг пидзӧсъяс вылас лэдзчысьлӧ, яла-нитшсӧ кияснас малалӧ, но гобъяс му пырыс мунӧмаӧсь.

Мед оз чужъяв дай. Велалас, гашкӧ, водзӧ вылӧ.