ТӦВРУТОР

Мамыс вӧрӧ муніс кор,
Пышйис гортысь тӧврутор.
Лэбис, быттьӧ ышмӧм чань,
Кӧть и вӧлі сійӧ шань.
Козлысь видліс роя тош,
Кыдзлысь легӧдыштіс вож.
Баддьӧс летіс сэн и тан,
Юлысь нямралыштіс бан.
Тӧвзис сиктӧ, лэптіс бус,
Весиг садьмис пӧрысь сус.
Ваньӧ пилысь сера мач
Керка стенӧ лыйис — швач.
Качай вылын лешсис дыр,
Кытчӧдз эбӧсыс эз быр.
Воис гортас рытъядор,
Шонді пуксьӧ вӧлі кор.
Мамыс видіс сійӧс, дерт,
Весиг кампетсӧ эз сет.
Кӧн пӧ ветлін быдса лун?
Мӧдысь ӧтнад пӧ эн мун.
Вошан пӧ да он и сюр,
Ӧшинь уланым пӧ дур.

Узьӧ ӧні тӧврутор,
Мый и вӧчас, садьмас кор?