ВАРГЫЛЬ КОК

Коркӧ ӧтчыд воши вӧрӧ,
Пуыс вӧлі ставыс дзӧрӧ.
Меным воча лоис ош,
Шуӧ: «Эн-ӧ, зонка, вош?»
Воши, мися, варгыль кокӧй,
Кежсьӧма тай туйсьыс бокӧ.
Инды меным гортлань туй,
Сэсся, кытчӧ гажыд, уй.

Зэв пӧ сюсь тай кӧсъян лоны:
Медым тэныд гортад воны,
Ковмас мойдса Маша моз
Менсьым гажӧдыштны поз.
Ветлы вала, петав песла,
Дӧрӧм-гачӧс сэсся песлав,
Мыськы, пиӧ, тасьті-пань,
Пӧжав чӧскыд небыд нянь.

Ошкыд — абу гортад пӧчыд:
Кыдзи шуис — сідзи-й вӧчи.

Ошкис менӧ варгыль кок:
«Тэ тай, пиӧ, абу лёк.
Нӧшта коркӧ татчӧ волы,
Меным ёртыд ёна колӧ.
Маша тшӧтш жӧ волас мед,
Эз кӧ верӧс сайӧ пет».
Сэсся, ог жӧ пӧръяв тайӧс,
Ошкыд менӧ гортӧдз вайис.
Кӧсъян — эскы, он кӧ — эн,
Тэныд — кывны, мойдны — мен.