САРИДЗ ДОРСА ОШ

Оліс-выліс ӧти ош,
Эз на быдмы сылӧн тош.
Ӧтчыд семья пытшкын шуис:
«Асьныд узьӧй пемыд гуын,
Таво сэтчӧ ме ог вод,
Вӧрас гуляйтышта — вот!»

Батьыс-мамыс, чойыс-вокыс
Янӧдісны варгыль кокӧс,
Но эз кывзысь гӧна юр,
Муніс гортсьыс — и эз дур.

Вӧрсӧ омӧля кӧть тӧдіс,
Муніс лун дай муніс мӧдӧс,
Ордйис уна нюр да оль,
Вуджис уна ю да ёль.
Вежон муніс, тӧлысь муніс,
Гортыс надзӧникӧн вуніс.
Лымйӧн пуркӧшитіс кор,
Аддзис войвыв саридз дор.

Сэксянь век на сэні олӧ,
Чужанінас вӧтӧн волӧ.
Лӧсьӧдӧма ассьыс рӧд,
Еджыд лоӧма — он тӧд.

Он кӧ эскы — ветлы сэтчӧ,
Кытчӧ воан — сэн и чеччан.