ТУЛЫС

Луныс синсӧ тільӧ
Асывъяснас водз,
Ӧдйӧ куртны зільӧ
Енэжыслысь жодз.

Шонді енвевт рыас
Катласьӧ вель дыр.
Енэжтасын кыа
Востымасьӧ пыр.

Надзӧникӧн сылӧ
Лунӧ банысь лым,
Кӧть и зэв на ылын
Олӧ тасянь гым.

Польдіс берба-баля —
Дзоридз нисьӧ гар.
Но оз дыр на паляв
Кодзувкотлӧн кар.

Пыста, шойччӧм пыдди,
Шондӧдіс да — чож:
Оз и дугдыв, лыддьӧ,
Кыдзлӧн кымын вож.

Ывла вылӧ петіс
Нюмъёвтӧмӧн кань.
Ставыс вӧльнӧй светас
Воддза серти шань.

Ӧти шонді улын
Сизим пӧвста кӧр.
Чужан муӧ тулыс
Бергӧдчӧма бӧр.