МЕДВОДДЗА ТУЙ КОМИ ТЕАТРЛӦН
1. СИКТЪЯСТІ.
Сыктывкарысь вӧрзьӧдчӧм мысти быттьӧ миянлы долыдджык лои. Вӧлисти театр петіс аслас прамӧй удж вылас — сиктъясӧ, вӧр лэдзанінъясӧ, гажӧдігмоз коми уджалысь войтырӧс югдӧдыштны, кыпӧдыштны налысь сьӧлӧмнысӧ колана гырысь могъяс ӧдйӧджык олӧмӧ пӧртӧм вылӧ.
Ыджыд уджмог сулалӧ коми театр водзын. Петім ми эгӧ куш ворсӧм вылӧ.
Мем тӧд вылӧ уси воддза ветлӧмным. Буретш дас ӧтик во сайын, муртса на еджыдъясӧс Аныбӧдз зырим, 1920 воӧ январ тӧлысьын тадзи жӧ ми ветлӧдлім коми труппаӧн Сыктыв вожӧд — Поёлӧдз, Эжва вожӧд — Вомынӧдз, волім 17 сиктӧ. Бура ыджыд удж сэки бергӧдім. Кӧть йӧзыс ӧнія дорысь пемыдджыкӧсь вӧліны да, кодсюрӧ видзӧдісны букышӧн театр вылӧ, сӧмын уджыслы подулыс вӧлі бур: буретш мездӧма вӧлі еджыдъясысь сійӧ сиктъяссӧ. Миян мог вӧлі — кыпӧдны да ёнмӧдны Сӧветъясӧс, уджалысь йӧзсӧ кыскыны найӧ бердӧ. Сэки, дерт, уджыс и олӧмыс вӧлі мӧд пӧлӧс, эз ӧнія кодь. Эз вӧв вӧр лэдзӧм, эз вӧв колхозъяс тэчӧм, — гӧгӧр вӧлі «лӧнь», — быдӧнлӧн сэки вӧлі сӧмын ӧти удж, ыджыд мог — вӧтлыны Латкинлысь бандасӧ, мездыны Коми му врагъясысь. А ӧні — гӧгӧр пуӧ, мунӧ социализм тэчӧм, ыджыд ӧдӧн, чорыд шумӧн, став кадыс биа-бордъя.
— Кутшӧма, бара, миянӧс примитасны коми уджалысь войтыръясыд-а? Вермам-ӧ асланым уджӧн справитчыны кыдзи колӧ? Мед эськӧ некод жӧ «артист» котырысь эз висьмы-а...— уна пӧлӧс мӧвп юрын бергалӧ.
Туй миян — Кулӧмдін районысь уджалысьясӧс обслуживайтны. Пӧпуттьӧ вӧчавны спектакъяс сиктъясын.
Медводдза спектакль пуктім (карысь петан лун рытнас жӧ) Визябӧжын. Керка ичӧтик, сцена дзескыд, скамьяяс, пызанъяс оз тырмыны — ваялісны кодсюрӧ гортсьыныс. Йӧзыс тыр воліс. Нинӧм — вермим, сёрнитім удж-могъяс йылысь. Видзӧдысьяслы ёна кажитчӧма. Эштӧм бӧрас на оз мунавны.
— Татшӧмсӧ ещӧ нэмӧн на некор эгӧ аддзывлӧ. Тайӧ тай не на киноыд!
Нӧшта долыдджык миянлы лои: медводдза петкӧдчӧмным уджалысь войтырлы сьӧлӧм выланыс воӧма.
Тадзи ми пыр кайим спектакасигтырйи да йӧзсӧ удж вылӧ чуксалігтырйи Шойнатыӧдз.
Шойнаты — район центр. Кык лун олім, кык спектакль вӧчим. Сэні висьталісны миянлы: Пӧддельнӧй тракторнӧй базаын пӧ ыджыд прорыв лоӧма. Райком тшӧктіс кайигмоз кежавлыны базаас.
Кӧдздӧдіс поводдяыс: ныртӧ орӧдӧ. Кодсюрӧ миян «артистъяс» омӧлик шебрасаӧсь («сынӧд шебрас») да, ёна чеччӧдліс, котрӧдліс.
Воим базаӧ. Пӧддельнӧйсянь базаӧдзыс 18 килом. Тайӧ — медводдза вӧр туй миян. Ёна дзетйӧдліс, швачкӧдіс пуяс бердӧ да мыръясӧ, — бокас эськӧ шливквидзӧ шыльыд-мольыд тракторнӧй трасса да, оз позь сэті ветлыны вӧлӧн.
Базаын — мастерӧвӧй йӧз олӧны: трактористъяс, додь вӧчысьяс да «служакъяс».
— Кӧн нӧ прорывыс? — юалам.
— Тасянь нӧшта 9 километр. Сэні вӧр лэдзысьяс-кадрӧвикъяс.
Кайим сэтчӧ — «Изъя ёль». Сэні вӧчим спектакль баракын. Йӧз уна вӧлі — морт 120 гӧгӧр. Сэтчӧ жӧ вӧлі неважӧн воӧма горкомсянь бригада, вежон кымын нин уджалӧма. Первой сёрнитім, висьталім ӧнія гырысь могъяс йылысь, чуксалім бырӧдны прорыв, босьтчыны сьӧлӧмсянь вӧр лэдзны да сетны тракторъяслы удж (прорывыс сійӧ и вӧлі: вӧр лэдзысьяс омӧля уджалӧмаӧсь да вит трактор весьшӧрӧ, уджтӧг сулалӧ). Спектакль бӧрын ме чукӧсті:
— Тыртамӧй, ёртъяс, вӧр лэдзан программанымӧс, нӧшта содтӧдӧн!
— Тыртам! Тыртам! — воча унаӧн горӧдісны.
Сійӧ рытнас жӧ бӧр лэччим базаӧ: кайигӧн кӧсйысьлім воны да спектакль вӧчны сэні. Столӧвӧйын тырыс йӧз: мунӧ производственнӧй сӧвещанньӧ. Воӧма «натшальство» тшӧтш: Шойнатыса вӧрпромхозысь Коскоков, Пӧддельнӧй участокысь ^Авторыс гижӧ: Пӧддельнӧй участокса вӧрпромхозысь. Збыльысьсӧ Пӧддельнӧй участокыс вӧрпромхозыслӧн. – «Мусюр сайын» небӧгысь пасйӧд./^ Куклин. Медыджыд сёрниыс — прорыв бырӧдӧм йылысь.
Вой шӧр бӧрын, сӧвещанньӧ помасис да, вӧлисти ми вӧчим спектакль — баракын, веськыда джоджас. Помасис миян ворсӧмным 3-ӧд часын да некод эз вугырт, эз мун ни, быдӧн кывзісны-видзӧдісны сюся.
Тадзи ми вӧрӧ медводдзаысь кайигӧн ӧти рытӧ кык «рыт» вӧчим.
Бӧр лэччим базаысь асывводзнас. Миян ямщик — пӧрысь пӧль — вӧла туйысь друг кежис трактор туйӧ да гӧнитӧ бура. Сӧмын тай этша лои мунӧмыс-а: паныдасис надзор да бӧр тшӧктіс петны сэтысь. Кымынкӧ «ма» лэдзис жӧ миян пӧль сэтчӧ. Ладнӧ ещӧ эз штрапуйтны да!..
Кӧть эськӧ и вӧрӧ кайлім, да сӧмын жӧ исыштӧмыс и лои: вӧрсӧ кындзи эгӧ аддзылӧ пӧшти нинӧм, — рытнас сёрӧн нин воим да, удж вылысь вӧлі пырӧмаӧсь нин кер лэдзысьяс. Уна кер вомӧн вуджим — туй вывсьыс абу вештыштӧмаӧсь да.
Кулӧмдінӧдз кайигӧн некытысь ми эгӧ аддзылӧ некутшӧм художество уджлысь туйсӧ: быдлаын сійӧ куслӧма. Ми быд сиктын организуйталім кружокъяс, бӧрйим сэтчӧ окотитысьясӧс да руководъясӧс, сетім индӧдъяс. Сӧмын быдлаын ӧти гӧлӧсӧн шуӧны:
— Вайӧй миянлы бур коми репертуар!
Сійӧ — меддзескыдін коми художествоа уджын. Ок, колӧ, колӧ коми гижысьяслы сы вылын уджыштны.
Ыджыда нин кыптӧма Кулӧмдіныд воддза серти. Кымын лавкаыс весиг сэні, карын сы мындаыс абу! Нардом зэв бур. Миян воигкежлӧ кӧдзыд вӧлі; райпо неважӧн сотчыны кутлӧма да сэтысь тӧварсӧ петкӧдлӧмаӧсь нардомас (орчча керкаыс). Ёна бура примитісны коми театрӧс кулӧмдінса. Кык спектакль вӧчим, организуйтім районнӧй опорнӧй штаб художествоа уджӧн веськӧдлыны.
Сэні райкомын сӧгласуйтім водзӧ ветлӧдлан маршрут (туй) — вӧр делянкаяс пасйим, кытчӧ ковмас волыны миянлы. Кулӧмдін район вӧлі кыссьӧ вӧр лэдзан уджӧн став Коми обласьтас медбӧрын. Колӧ вӧлі вӧрзьӧдны уджсӧ, вештыны сьӧд пӧв вылысь.
Кулӧмдінын жӧ ми, коми театрын уджалысьяс, вӧр лэдзанінъясӧ мунан «вечерняӧ», шуим объявитны асьнымӧс ударникъясӧн: уджавны велӧдчӧмӧн, шойччан лунъястӧг, бырӧдны ас костысь быд нелючки, бурмӧдны производство быд боксянь. Сэсся сэні жӧ юклім аслыным «пытшкӧсса» удж:
Дас куим друг:
Илля — политрук,
Виктор — руковод,
Ваня — тшӧтӧвод,
Пантилей — домком,
Педӧсся — продком,
Сакаров — кассир,
Амон — кӧлуй видзысь мастер,
Санко — администратор,
Ӧндрон — декоратор,
Саня — контролёр,
Надя — билетёр,
Клавдилы уджыс эз шед —
Амонлы отсасьӧ мед,
Сэсся пасъя дзоляник мортӧс —
Митипӧр Ӧльӧ Малыгин ёртӧс.
Сійӧ специалист:
Гармонист.
Тадзи ми, ударникъяс, мӧдӧдчим Кулӧмдінысь вӧр лэдзанінъясӧ. Сійӧ — миян главнӧй уджыс. Став верстьӧ уджалысь йӧзыс вӧрын, сиктын сӧмын служакъяс, пӧрысьяс, челядьяс, нывбабаяс да сбоку (случайнӧ) веськалӧмъяс аддзылісны миянлысь уджнымӧс.
2. ВӦР ШЫЗЬӦДІМ.
Кулӧмдінсянь туйыс вожалӧ: шуйгавыв кӧ кежан — Помӧсдінӧ воан (сэсянь Печӧраӧ); веськыдвыв кӧ кежан — Донӧ (сэсянь бара кык туй: шуйгавыв — Мысӧ, веськыдвыв — Керчомъяӧ да Вочӧ). Ми пыр веськыдвыв кежим: первой Донӧ, сэсянь бара веськыдвыв — Керчомъяӧ.
Дон — ичӧтик сикт. Эгӧ кӧсйӧ сэні вӧчны спектакльсӧ, тэрмасим Керчомъяӧ да сэтісянь ӧдйӧджык вӧрӧ мунны. Сӧмын вӧвъяс эз лоны да, чем прӧста овны, вӧчим. Станциясянь лыддьысян керкаӧдз километр кымын лоӧ. Став кӧлуйнымӧс тэчим пу доддьӧ, асьным сэсся доддясим да кыским. Кодсюрӧ шмонитӧны: ӧні пӧ миян тайӧ прамӧй нин...
«По Дону гуляет...»
Аскинас вуджим Керчомъяӧ. Ямщик висьталӧ:
— Керчомъя ыджыд, чиганъяс вӧлі важӧн шуӧны Керчомъятӧ мӧд Киевӧн.
Ыджыд и вӧлӧма — километр сизим кузьта. «Мӧд Киевын» весиг торъя лыддьысян керка абу (сельсӧветас эм сӧмын ӧтик жыр), сэсся сцена абу — спектакасьны некӧн.
Эм сэні кык коммуна. Ми сувтім кывтыд коммунаас — «Ӧтувтчӧм». Коммуналӧн — аслас керка, вӧчӧмаӧсь важ «правленньӧысь». Сэні ми и вӧчим спектакльнымӧс. Сценасӧ лӧсьӧдім пӧвъясысь.
Вӧрпромхозлӧн Керчомъя участокса ^Авторыс бара мӧдарӧ гижӧма: Керчомъя участокса вӧрпромхоз, кӧть эськӧ вӧрпромхозыслӧн участокыс. – «Мусюр сайын» небӧгысь пасйӧд./^ юралыськӧд Белов ёрткӧд лӧсьӧдім маршрут, кутшӧм делянкаясӧ ветлыны театрӧн. Вӧрӧд ветлӧмысь мынтысьны кӧсйысис вӧрпромхоз.
Медвойдӧр кайим «Рака-Куаӧ», Керчомъясянь лыддьӧны 25 километр. Подводаяс босьтім Керчомъясянь кайлыны бӧра-водза «Уюптӧдз» (40 килом.).
Рака-Куаын эм «гӧрд пельӧс», сӧмын зэв ичӧт дай сцена абу. Ворсім баракын, нар вылын. Йӧзыс сэні уджалӧ морт 100 кымын, бригадаясӧн. Уджныс мунӧ шӧркодя. Тӧдчӧ ордйысьӧм. Ӧтик артель — 6 морт — луннас вӧчӧ 100–110 керйӧдз. Мукӧдлӧн на вылӧ завидьныс петӧ да тшӧтш зільӧны кыссьыны, суӧдны. Эмӧсь и ӧткӧн-ӧткӧн пӧрӧдчысьяс. Найӧ бара вежалӧны артельяс вылӧ.
— Тіянлы, дерт, лӧсьыд; медбур вӧрыс веськаліс да, кык да куим кер шедӧ ӧтик пусьыс, дай оз ков ёна шӧйтны — дорвыв сортӧвӧй вӧр, — шуасьӧ ӧтик ӧтка уджалысь.
— Эн шуась, Ӧльӧксей дядь, ми ӧд арнас эгӧ жӧ аддзылӧ бур вӧрсӧ, пыр лои ӧктысьны да йывйысьны, кушинын уджалім, — вочавидзӧ сылы артельса шлен.
Спектакль дырйи ми кыпӧдім сёрни Керчомъяса вичко тупкӧм йылысь (матысмӧ вӧлі рӧштво). Вӧр лэдзысьяс ӧтитӧг сӧгласитчӧны сы вылӧ.
— Ми огӧ тӧдӧ, — шуалӧны, — мыйла ӧнӧдз эз тупкыны, сы йылысь ми кыкысь кымын нин вӧчлім решенньӧ.
Кывлім и кулацкӧй нога сьылӧм: ӧтик дядьӧ ёна кутліс бызгыны-элясьны омӧль сёян вылӧ. Сӧмын сы дор некод эз сувт, а сетісны ён отпор, дядьӧ ланьтіс.
Бӧрвылас тӧдмалім да, вӧлӧма дядьӧыд и збыльысь подкулачник. Керчомъяын ӧд ён кулак поз вӧвлі, дай ӧні на кольӧма. Неважӧн на сэні вӧлі черӧн кералӧмаӧсь кулакъяс ыштӧдӧмӧн ӧтик водзмӧстчысь вӧр лэдзысьӧс.
Тадзи ми волім 14 вӧр делянкаӧ: Керчомса участокын — 4, Воч участокын — 4, Немдін участокын — 2, Мыс участокын — 2 да Пӧддельнӧйын — 2. Быдлаын миянӧс примитісны бура. Мукӧдлаас вӧлі воам да кодсюрӧ букышӧн первойсӧ: видзӧд пӧ, петӧмаӧсь кимӧститчыны, кор уджавны колӧ. Сэсся висьталам ӧнія олӧм йывсьыс да ворсам да, оз мунны весиг — сэтшӧма кажитчас. Быдлаын кӧсйысисны норма тыртны, рӧштво дырйи гортӧ петавтӧг уджавны, субӧтник вӧчны оборона фонд вылӧ рӧштво лунся удждонсӧ пуктӧмӧн. Сӧмын кӧнсюрӧ тӧдчӧ на кулаклӧн влиянньӧыс, полӧмыс. «Уюптын» (Керчомъя участок) вичко тупкӧм йылысь сёрнитӧм бӧрын шуисны решенньӧсӧ быдӧнлы кырымавны. Вӧлі морт 90 кымын, а кырымасис сӧмын 23 морт, мукӧдыс мунісны, — дерт, повзисны. А кодысь повныс? Керчомъяса кулакъясысь.
Сідзжӧ «Шӧр куръяын» (Воч участ.) омӧля уджалӧны. Ми локтім да эз кӧсйысьны весиг баракас ворсны лэдзны.
— Мед пывсянын колӧкӧ дикуйтчасны! Баракӧ огӧ лэдзӧ.
Кыдзкӧ сэсся, ёна сёрнитӧм бӧрын, лэдзисны жӧ. Вӧлӧм, сэні ӧтилаын олӧны ставныс — кулакъяс тшӧтш и. Дерт, сэсся татшӧм нога видзӧдӧмыд лоас, торъя нин сы понда нӧшта, уджалысьясыс пӧ сэні кызвыныс керчомъяса «кык сикт костса» (зажиточнӧйяс) да.
Сэсся некытысь эгӧ аддзылӧ ми татшӧм лёк «настроенньӧяссӧ» вӧр лэдзысьяс костысь.
Уналаын эм радио (сӧмын кутшӧмсюрӧ элементъяс пӧ абуӧсь да, унджыкыс чӧв ланьтӧма). Куим делянкаын стрӧитӧмаӧсь клуб, сценаяса и быдтор, тӧрӧ 300–350 мортӧдз («Вылыс Йӧв» — 250 морт, «Анакты» — 300, «Сувода» — 350 морт). Унджыклаас ворсім баракъясын: типӧвӧй баракъяс гырысьӧсь, кыпыдӧсь, быдлаын югыд лампаяс сотчӧны. Эмӧсь газетъяс, этшаник литература. Сӧмын торъя югдӧдчан да политикаӧн тӧдмӧдан удж быдлаын омӧля пуктӧма — ставныс сетчӧмаӧсь уджӧ, вӧр лэдзан уджӧ.
Рӧштво дырйи уджалӧмаӧсь быдлаын субӧтникӧн: оборона вылӧ, «Миллерлы вочакыв» вылӧ, дирижабль стрӧитӧм вылӧ да мукӧд пӧлӧс общественнӧй коланаторъяс вылӧ. Ми ставным жӧ рӧштво лунӧ субӧтникалім «Улыс ёльын» (1379 кварт.) — катищӧ места весалім.
Вочын, миян чуйдӧдӧм кузя, кык рытӧн чукӧртӧма вӧлі 200 шайт «Миллерлы вочакыв» фондӧ (Воч — абу зэв ыджыд сикт).
Мыс участок — комсомольскӧй вӧр участок. Уджалӧны комсомолечьяс бригадаясӧн, весиг вӧрпромхозас уджалысьясыс комсомолечьяс. Главнӧй делянкаыс «Суводаын». Сэтчӧ чукӧрмӧмаӧсь комсомолечьяс пӧшти быд вожысь. Олӧны-уджалӧны бура, гажаа, чистӧя, весиг баракъясас занавесъяс ӧшалӧны. Ыджыд столӧвӧй сэні налӧн, ыджыд сцена, быдтор эм. Лӧсьыд стенгазет лэдзӧны. Тӧдчӧ быдлаын комсомольскӧй киподтуй ^Авторыслӧн «киподув». – «Мусюр сайын» небӧгысь пасйӧд./^. Столӧвӧйса заведующӧй — Мальцев ёрт (ачыс Сыктыв Ыбысь) — петкӧдліс меным ассьыс ыджыд тетрадь — кывбуръяс да висьтъяс гижӧма уна. Сюрӧсыс быдӧнлӧн ӧнія удж-могъяс йылысь, сӧмын зэв жебӧсь. Сетышталі сылы индӧдъяс, кыдзи колӧ уджавны худож. литература вылын.
Мыссянь коми театр бӧр бергӧдчис карлань. Лэччигӧн кылім: Пӧддельнӧй тракторнӧй базаын пӧ бара прорыв — 3 трактор сулалӧ уджтӧг, нинӧм кыскыны. Тыдалӧ, Изъя ёльын вӧр лэдзысьяс вунӧдӧмаӧсь ассьыныс кӧсйысян кывнысӧ.
Ставсӧ коми театр вӧчис 36 спектакль, обслужитіс 5000 мортысь унджык, на пиысь дзик вӧрын уджалысьясӧс 2100 мортӧс.
Кутшӧм результат лоис миян ветлӧмысь? Гашкӧ, вывті ыджыда лоӧ шуӧма, а миян ветлӧм бӧрын Кулӧмдін район вӧр лэдзан уджӧн сьӧд пӧв вылысь вешйис да сувтіс воддза радъяскӧд орччӧн. Ми чайтам, тайӧ вӧрзьӧмас тшӧтш эм ичӧтик пай и коми театрлӧн.
Дерт, вӧліны миян уджын и нелючкияс. Медыджыд судзсьытӧмторнас ми асьным лыддям со мый: вывті гырысь вӧлӧкъясыс сиктсянь вӧр делянкаясӧдз да, подводаяс (кодъясӧс пыр ковмис босьтны сиктысь бӧра-водза ветлӧмӧн) эз виччысьны миянӧс вӧрын лишнӧй сутки. Сы понда эгӧ вермӧ вӧрас ёна паськӧдны организация удж, театрлӧн ветлан сямыс пӧри этша «гастрольлань». Тайӧ нелючкисӧ шуим водзӧ кежлӧ бырӧдны.
Ӧні коми театр муніс Емдін ^Нёбдінса Виттор гижӧ: Емва (Усть-Вым) районӧ. – «Мусюр сайын» небӧгысь пасйӧд./^ районӧ.
Ме чайта, дыр казьтыласны коми уджалысь войтыр коми театрлысь медводдза волӧмсӧ. Ёна быдлаын корисны:
— Тулыснас бара волӧй.
А, дерт, лоӧ! Сы вылӧ и коми театрсӧ лӧсьӧдім — уджалысь йӧз костӧ ветлывлыны, уджалан ӧдсӧ содтыны.
Нӧшта ковмас татчӧ содтыны коми «артистъяс» йылысь. Найӧс гӧтӧвитім колян арын, ӧтик тӧлысся курс вылын. Сэсся наысь жӧ медым —
Ӧддзӧдны культура кыпт,
Котыртчис КИПТ; ^Коми Инструктивнӧй передвижнӧй театр./^
Лыддьыссьӧ сэн
Дас куим шлен:
Колхозникъяс, батракъяс,
Крестяна, служакъяс,
Робочӧй-полиграфистъяс ^Типографияын уджалысьяс./^ —
Татшӧмӧсь коми «артистъяс».
Кӧть и лолісны кутшӧмсюрӧ провалъяс налӧн, сӧмын ассьыныс рольяссӧ бура тӧдӧны вӧлі. Таво март 20 лунсянь воссьӧ бара курс, сэні выльясӧс гӧтӧвитам да важъяссӧ бурджыка подковалам.
Программа вӧлі миян пыр ӧти пӧлӧс. Тайӧ — бара жӧ ыджыд судзсьытӧмтор коми театрлӧн. Ми эськӧ кӧсйим туйын лӧсьӧдны содтӧд репертуар да нинӧм эз артмы: кадыс абу — пыр ӧтарӧ мунан да уджалан, лун и вой — ударнӧй кад! Шойнатысянь босьтчылі лӧсьӧдны «Вӧр лэдзан частушкаяс» да Пӧддельнӧйын эштіс, а сьывны велӧдім вӧлисти Вочын. Эськӧ абу и кузь, абу и сьӧкыд, со:
«Овмӧс тэчӧм ӧдйӧ пуӧ,
Колӧ лэдзны уна кер.
Войвыв вӧрын йӧзыс жуӧ —
Дзижгӧ пила, камгӧ чер.
Вӧр лэдзысь, ми тэнӧ корам
Зіля тыртны норма-мӧд.
Ми тшӧтш тані сьылӧм сорӧн
Частушкаӧн содтам ӧд!
Медым уджыс муніс бура,
Мед эз торксьы сылӧн план, —
Нелючкияс кодлысьсюрӧ
Тіян водзӧ петкӧдлам.
Сидӧр шуӧ: «Черӧй ныжмис,
Норма тыртӧм оз нин ло!?»
Пятилетка татшӧм дышлы
Тырмас тыртны кызь вит во.
Сизим норма тыртны ружтӧ
Ласей Мӧсей — паськыд ныр.
Лун-лун шӧйтӧ, лымсӧ юждӧ,
Тільсьӧ-мырсьӧ кывнас пыр.
Пиля Климлӧн тошкыс пӧла,
Сопрон Мишлӧн синмыс лӧз:
Видзӧ пырӧм татшӧм вӧлі, —
Празднуйтісны гажа йӧз.
Сур да вина вӧсна кулӧ
Миян бригадир Педот,
Оръявлытӧг юӧ-кульӧ,
Зунясьӧ пыр садьтӧм код.
Тадзнад уджыд вӧрад падмӧ,
Тадзи норматӧ он тырт.
Медбур кадӧ босьтчыв ладӧ,
Лёксӧ песовт, няйтсӧ зырт!
Шковгы паськыд лэчыд чернад,
Медым шызяс парма вӧр.
Враглы плешас дзенгы кернад,
Керышт вужсӧ, мед эз дзӧр!
Быд нелючки эрдӧ петкӧд,
Пятилетка вӧсна доль,
Ордйысьны пет мӧда-мӧдкӧд,
Уджнад бӧрӧ тэ эн коль!»
(Нимъяссӧ позьӧ вежлавны, лёка уджалысьяслысь на пыдди пуктавны.)
Быд организациялы колӧ отсавны том коми театрлы, мед сійӧ быдмис, ёнмӧдіс да паськӧдіс ассьыс колан уджсӧ.
КАПП-са шленъяслы медбӧръя кыв: лӧсьӧдӧй репертуар — посньыдик, кокньыдик ворсанторъяс. Медъёна колӧны ӧні посньыдик (малые) формаа петкӧдланторъяс.
