СЫКТЫВКАРСА ХОР

Став сикас искусство пытшсьыс быдӧнлы медся матысаыс да медся тӧдсаыс — сьылӧм, торъя нин гажаӧн да лӧсьыдӧн быдӧнлы кажитчӧ ӧтувъя сьылӧм (хор). Сӧмын сьылӧмыс некор оз вермы лоны бурӧн, сьылысьясыслӧн кӧ абу котыртчӧмыс (организация). Быдсяма уджӧ кӧ колӧ котыртчӧмыс, ӧтувъя сьылӧмыд сытӧг дзик ньӧти оз вермы артмыны.

Миян Сыктывкарын ӧнӧдз на эз вӧв сьылысьяслӧн некутшӧм котыртчӧм. Эськӧ коді кутчысьлывліс лӧсьӧдны концерт либӧ хор чукӧртны, сійӧ тӧдӧ и аддзӧ вӧлі, кутшӧм сьӧкыд ноксьыныс: пыр лоӧ вӧлі кар кузя котравны, сьылысьясӧс корсявны. Мӧд-кӧ, сьылысьяслӧн эз вӧвлы прамӧйджыка лӧсьӧдчӧм концерт кежлас, йӧз водзӧ петӧм вылас (к выступлениям), сы понда унаӧн кольлывлісны недӧвӧленӧсь сьылӧмъяснас да бӧртинас концертъяс вылӧ омӧля видзӧдлывлісны, окотаныс усьлывліс кывзыны волӧмсьыс. Коймӧд-кӧ, репертуарын бура бӧрйысьӧм эз вӧвлы, дай репертуар вӧснаыс некод эз тӧждысьлы, эз зільлы выльмӧдны, содтыны, — шуны кӧ, хорӧвӧй музыкаа литературасӧ судзӧдныс некодлы вӧлі дай нинӧм вылӧ (сьӧмыс эз вӧв).

Со татшӧм нелючкиясыс и сувтӧдісны сьылысьяс водзӧ мог: котыртчыны да бурмӧдны быд ногӧн сьылан уджсӧ. Субӧтаӧ, апрель 27-ӧд лунӧ, профклубын вӧлі карса сьылысьяслӧн чукӧртчылӧм. Сэні шуисны: профклуб бердӧ лӧсьӧдны Сыктывкарса ӧтувъя хор (роч и коми сьылысьясысь). Примитісны устав кодьӧс. Бӧрйисны бюро 3 мортысь: Ник. Прок. Кузнецов (председатель), Викт. Ӧль. Савин (шлен) да Ӧль. Павл. Ёль (секретар), сэсся хорӧн руководитысьӧс — Анат. Прок. Кузнецов да сылы нӧшта 2 вежысьӧс (заместит.) — М. В. Шипунов да В. Ӧ. Савин. Уставас лючки урчитӧма: кыдзи кутас уджавны хорыс, мыйяс сувтӧдӧ ас водзас медгырысь могъясыс пыдди, кытчӧ кутас сьӧм мунны. Сэні жӧ шуӧма: хор пондас отсасьны политико-обществ. организацияяслы гырысьджык кампанньӧяс дырйи да революция праздникъяс дырйи.

Хорӧ вермас пырны быд морт, коді кужӧ сьывны, тӧдӧ нотаяс. Гижсьӧм йылысь позяс шыасьны бюроса шленъяслы либӧ руководительлы.

Кутшӧмкӧ организация кӧ кӧсйӧ лӧсьӧдны концерт, колӧ водзвыв шыасьны хор бюроӧ (профклубӧ).

Учрежденньӧяссянь да организацияяссянь колӧ хорлы сетны отсӧг, мед сійӧ вермис ӧдйӧджык ёнмыны да ассьыс уджсӧ бура пуктыны. Ӧні кежлӧ медыджыд коланторйыс — помещенньӧ (сыысь зэв дзескыд) да музыка инструмент (пианино либӧ рояль). Хор бюро кӧ тайӧяс йылысь кытчӧкӧ шыасяс, мед эськӧ эз жӧ йӧртны.

Миян карын бура уна сьылысьяс эмӧсь. Ставныслы колӧ пырны выль котыртчӧм хорӧ, сы вылӧ некутшӧм взнос оз ков мынтыны; колӧ сӧмын ӧтитор — ас окота.