ЗЭВ КОЛАНТОР

Уналӧн ас ногса сёрниа йӧзлӧн (вотякъяслӧн, чувашъяслӧн) чукӧртӧма, гижӧма, лӧсьӧдӧма зэв уна йӧзкостса сьыланкывъяс (народные песни).

Босьтам кӧ ми асьнымӧс — нинӧм на сы выйӧн абу вӧчӧма либӧ зэв этша вӧчӧма. «Шонді банӧй», «Асъя кыа», «Рытъя, шу, кадӧ» — сэсся и абу. Сьылам роч вылысь лӧсьӧдлӧмъясӧс либӧ коми стикъяс роч ногӧн (мотивӧн). Коми сиктъясын-грездъясын уналаын сьылӧны роч сьыланкывъяс («елисточик», «се ташки-кинарейки», «завелгою»), — дерт, сьылӧны лёк ногӧн, сьылысьясыс асьныс оз тӧдны, мый сьылӧны: ӧти-кӧ, рочнас оз кужны, мӧд-кӧ, сэтшӧма нин сьыланкывъяссӧ бертлӧдлӧмаӧсь, тшыкӧдалӧмаӧсь — весиг роч кывланьыс нин оз мун («шырйӧвкайӧ», гашкӧ, «широкая» вӧлӧма).

Татшӧм тшыкласьӧм сьыланкывъяс сьылӧмысь дзик нинӧм! Сӧмын ёнджыка коми йӧзӧс найӧ падмӧдӧны водзӧ мунӧмысь: кутшӧмкӧ некӧн абутӧм кывъяс юраныс пырӧны.

Мыйкӧ колӧ вӧчны та йылысь.

Ме чайта, кӧнсюрӧ, пыді Коми му пельӧсъясын эмӧсь на ва коми сьылӧмъяс, дзик коми ногӧн.

Колӧ быдлаысь чукӧртны миянлы коми йӧзкостса сьыланкывъяс. Колӧ тайӧ уджсӧ вӧчны регыдджык, медым эськӧ дзикӧдз эз вунны, эз вошны век кежлӧ.

Ӧткымын сьыланкыв эськӧ и гижавлӧма, сӧмын налӧн мотивъясыс абуӧсь, — колӧ корсявны тшӧтш.

Йӧзкостса сьыланкыв — зэв колантор! Сы серти позьӧ тӧдмавны йӧз олӧм-вылӧм йылысь зэв унатор.

Куим воӧн (Коми обласьт воссьӧмсянь) ми эгӧ вермӧ та вӧсна уджавны, — «некор вӧлі, сьӧм эз вӧв, некодлы вӧлі», — уна помка (причина) позьӧ аддзыны... Сэсся со ӧнӧдз нинӧм абу. Унасянь ме кывла: «Вай пуктӧй кутшӧмкӧ гажаджык коми рыт». Мый нӧ пуктан? Мый сьылан? Пыр ӧд ӧтитор он доль...

Олам Коми муын, коми сёрниӧн варовитам, — сьывны сӧмын комиӧн огӧ кужӧй — «нинӧм абу»... Эмӧсь эськӧ да, огӧ тӧдӧй, абу чукӧртӧма, абу корсялӧма. Кымын водзӧ пӧра кольӧ — сымын миян коми сьыланкывъяс вошласясны, ланьталасны пармаясӧ, сибдасны нюръясӧ, вӧясны юясӧ... Дыр ковмас сэки найӧс корсявны! Аддзамӧ-ӧ сэки найӧс?..

Воӧ тулыс — медся гажа олан кад. Тулысын быдӧнлы нимкодь, тшӧтш коми йӧзлӧн сьӧлӧмъясыс радлӧны. Уналаысь тулысын кылан сьылӧмъяс! Колӧ тулысын босьтчывны нин чукӧртны коми йӧзкостса сьыланкывъяс, ӧти сайын — мойданкывъяс, быдтор.

Тайӧ удж вӧчны ӧмӧй миян обласьтысь оз сюр сьӧм? Сюртӧг оз ов, оз ӧд вывті уна ков. Колӧ сӧмын кӧсйӧмыс, босьтчӧмыс. Тӧргӧвӧй учрежденньӧяс на отсыштасны!

Вайӧ босьтчыламӧй, коми войтыр, тайӧ зэв колан уджсӧ вӧчны!