ФЕЛЬЕТОНЪЯС КОЛӦ БУРМӦДНЫ

Тӧлысь-мӧд нин «Югыд туй» газетын корсюрӧ (бура тшӧкыда) петавлӧны фельетонъяс «Журналистлӧн». Войдӧрсӧ ми чайтім: мися, гашкӧ, водзӧ кежлӧ Журналист бурджыка кутас гижны фельетонъяссӧ, да эг и шыасьлы сэки. Сӧмын тӧдчыны пондіс: непӧштӧ бурмӧм эз ло, а нӧшта лёкджыкӧсь кутісны петны фельетонъясыс. Ме та йылысь казьтыштлі нин весиг обласьтувса селькоръяс 3-ӧд сӧвещанньӧ вылын. Сӧмын тай и сійӧ на абу инмӧма Журналистлы вежӧр-сямас: фельетонъясыс дзикӧдз пондісны тшыкӧдны миянлысь «Югыд туйнымӧс». Эськӧ фельетонъяслӧн могыс дзик мӧдарӧ — гажӧдны, ульсавмӧдны, «интерес» сетны газетъясыдлы. Ӧнія сэсся со лоӧ юавны лыддьысьяслысь: кыдз ті, ёртъяс, шуанныд — кажитчӧны али оз тіянлы фельетонъясыс Журналистлӧн? Ме ас пайысь веськыда шуа — оз.

Быд фельетон Журналистлӧн босьтӧ газетлысь местасӧ зэв уна (став увдорсӧ лист бокыслысь), сӧмын лыддьыны кутан да, ваыс вывті уна (гудыр кизьӧр ва!), а паньыштныс пытшсьыс нинӧм оз шед. Мукӧд фельетонас («Сісь вужйысь быдмӧ куст», 44-ӧд №-ын) сэтшӧм кузя везгӧдӧма суниссӧ — весиг дӧзман. Позьӧ вӧлі гижыштны дженьыдика, а Журналист займитӧма газетлысь дзонь «пӧдвал». Сэсся гижан сямыс (кыв стильыс) абу «фельетоннӧй» — зэв сьӧкыд лыддьыныс. Вывті уна «кыдъя» коми сёрни паныдасьлӧ быд фельетонын. Тшыкӧ весиг мича литература коми кывйыс! Та бӧксянь медся нин омӧльӧсь бӧръя фельетонъясыс. «Дегдӧма» (мыйла нӧ абу «гегдӧма»?), «Черань вез». Босьтам «Черань вез». Комиӧн абу кыв «крестӧвик», «дзавъям (распутаем)» — ньӧти оз ло «распутаем»: дзавйыны — сюри быдмавны дӧра кыигӧн, «утёк», «мый» (что), «ми, брат», «пустяки», «интелегенция» да с. в. Чайтіс, кӧнкӧ, Журналистыд: татшӧм кывъясыд пӧ мичмӧдасны («краситасны») фельетонсӧ. Ньӧти оз. А мыйсӧ абу гудралӧма 154 визяс? Ставсӧ позис гижны кокньыдик кывйӧн 54 визьӧ тӧрӧдчӧмӧн.

Гашкӧ, Журналист мӧвпалӧ асьсӧ сувтӧдны ваӧн тырӧм фельетонъяснас Кольцовкӧд либӧ Заславскӧйкӧд да? Ок, ылын на, другӧ, сэтчӧдз! Уна перӧ на ковмас чегъявлыны!..

Фельетонъяс гижны Журналистлы колӧ велӧдчыны... «Коми комсомол» газет вылысь. Тайӧ газетыс кӧть муртса на нырсӧ мыччыштіс, а гижан кывйыс сылӧн ёна нин бур Журналистлӧн дорысь.

Фельетон кӧ гижан, мед сійӧ вӧлі юр вемад сатшӧ веськыда. Лишнӧй ванад оз ков кизьӧртныд. Гижан кывйыд колӧ ёсь, лэчыд, дженьыдик сёрникузяа. Сэки сӧмын фельетоныд интереса лоас, горша лыддьыссьыны пондас и.

Нёбдінса Виттор

Редакциясянь:

Ми лыддям Витторлысь гижӧдсӧ коланӧн. Газет лыддьысьяслы колӧ индавны миянлысь омӧльторъяссӧ. Сытӧг газеттӧ он вермы бурмӧдны. Журналистлысь фельетонъяссӧ ми ог жӧ вермӧ быд дорсянь ошкыны. Тырмытӧмторъясыс сэні эм уна. Сӧмын Виттор, ми ногӧн, вывтіджык омӧльтӧ. Коми кыв вылын ӧнӧдзсӧ пӧшти некод на эз гижлыны фельетонъястӧ. Газетӧ гижысь том войтыр вӧлисти на велӧдчӧны. Скӧра равӧстӧмнад недыр и повзьӧдны. Миянлы эськӧ вӧлі зэв нимкодь, пондісны кӧ гижны фельетонъяссӧ коми литераторъяс. Найӧ эськӧ вермисны петкӧдлыны, кыдзи колӧ гижны мичаа бур фельетонсӧ. Вай, Виттор, заводит ассяньыд.