ЭНӦ КЫВЗӦЙ ЛЁК СЁРНИЯС!

Миянлы сиктъяссянь воӧны татшӧм юӧръяс: уналаын пӧ паськалӧмаӧсь лёк сёрнияс, больгӧмъяс война йылысь. Сёрнитӧны, регыд нин пӧ (тайӧ тӧлысьнас пӧ гашкӧ да) кыптас война; миян Сӧвет Союзын пӧ став пабрик-заводъясыс нин уджалӧны военнӧй оружйӧ вӧчӧм вылын да сы вӧсна пӧ сэсся некутшӧм тӧвар оз нин волы сиктъясӧ. Сӧрӧны быдсяматорсӧ.

Дерт, война вылӧ некод оз радлы. Сэтшӧм лёк сӧрӧмъяс вӧснаыс сэсся уналаын нин и повзьӧмаӧсь йӧзыс.

Став сёрниыс тайӧ (ӧнія) кадъясӧ война кыптӧм йылысь — весьшӧрӧ больгӧм, сӧрӧм.

Сэтшӧм сёрнияссӧ вермасны лэптыны сӧмын Сӧвет власьтлы паныд мунысьяс, медым кыдзкӧ-мыйкӧ торкны уджсьыс, падмӧдны овмӧс кыпӧдӧмысь.

Колӧ быдӧнлы тӧдны: ӧні регыдӧн миянлы война оз на грӧзит, миян вылӧ капиталист государствояс тайӧ кадъясын оз на лысьтны войнасӧ кыпӧдны. Со мый понда оз:

ӧти-кӧ, капиталист государствояслӧн ас костаныс мунӧ ыджыд вензьӧм, найӧ асьныс мӧда-мӧдныскӧд зыксьӧны;

мӧд-кӧ, мукӧд государствояс пытшкӧсса уджалысь йӧзыс (робочӧйяс да крестяна) дугдывтӧг вермасьӧны асланыс капиталистъяскӧд да торкӧны найӧс миян вылӧ воны лӧсьӧдчӧмсьыс;

коймӧд-кӧ, быд капиталист государствоса робочӧйяс да крестяна чорыда сулалӧны СССР дор, сы вӧсна полӧны капиталистъяс кыпӧдны асланыс государствояссьыныс уджалысь йӧзсӧ войнаӧн миян вылӧ (код тӧдас, кодарӧ найӧ штыкъяссӧ бергӧдасны);

нёльӧд-кӧ, ми асьным, СССР-са уджалысь йӧз, абу нин зэв омӧльӧсь, овмӧс ёна нин кыптіс да ёнмис, судзсяс нин вынным капиталистъяскӧд водзсасьны. Ӧні на, Гӧрд Армиялы дас во тыран лунъясӧ, СССР-са уджалысь войтыр став мирыслы петкӧдліс ассьыс ёнлунсӧ. Капиталистъяс полӧны и миян Гӧрд Армияысь.

Ставыс тайӧ ӧтвылысь и кутӧ капиталистъясӧс миян вылӧ войнаӧн кыпӧдчӧмысь.

Дерт, коркӧ лолӧ на война, сӧмын некод оз вермы урчитны, кор сійӧ лоас. Капиталистъяс миян Сӧвет государство вылӧ ёна эськӧ пиньяснысӧ йирӧны да, ӧні нинӧм на оз вермыны керны.

Сідзкӧ миянлы повны ӧні нинӧмла на. Сӧвет государстволӧн пыр ӧтарӧ кыптӧ овмӧс, мукӧд государствояскӧд волысьӧм-тӧргуйтӧмыс пыр жӧ ёнмӧ да паськалӧ (Англия дзугны эз вермы).

Колӧ миянлы тайӧ каднас чорыдджыка босьтчыны овмӧс кыпӧдан уджӧ. Пабрик-заводъяс миян оз куш военнӧй кӧлуй вӧчны, найӧ вӧчӧны уна пӧлӧс машинаяс да тӧвар. Ӧні кӧ сиктъясӧ оз тырмы кутшӧмсюрӧ тӧварыс — сійӧ мукӧдтор понда, абу война вӧсна (сы йылысь ми гижлім нин газетъясӧ).

Оз ков кывзыны лёк сёрнияс, сӧрӧмъяс! Колӧ лючки уджавны быдӧнлы аслас удж вылын!