ГӦРДАРМЕЕЧ — АБУ ВАЖ САЛДАТ!

Унаысь на кывлан гӧрдармеечьясӧс важ моз салдатӧн шуӧм. Весиг эмӧсь на и сэтшӧм йӧз, кодъяс мисьтӧма видзӧдӧны гӧрдармеечьяс вылӧ, — паныдасясны ывлаын ли, лавкаын ли, театрын ли, мукӧдлаын ли да, найӧс оз и прамӧй йӧз туйӧ пуктыны, пыр кыдзкӧ зільӧны бӧрӧджык да бокӧджык зырны. Важ салдатӧс да ӧнія гӧрдармеечӧс унаӧн на ӧткодьӧн лыддьӧны.

Тайӧ — ыджыд ӧшыбка. Ӧнія гӧрдармеечьяс зэв ёна торъялӧны важ салдатъясысь.

Важ армияад салдаттӧ чегъявлісны, тшыкӧдлісны, велӧдлісны сулавны сӧмын «за веру, царя и отечество». Салдатыд вӧлі дзик коньӧр кодь, кывтӧм пемӧс кодь, сідзи и нимтӧны вӧлі сійӧс — «серӧй скӧтинаӧн». Некутшӧм общественнӧй местаясӧ салдатъясӧс эз сибӧдлыны, быдлаысь найӧс, понъясӧс моз, вӧтлывлісны, весиг и вывескаяс вӧвліны: «Вход собакам и солдатам воспрещается». Некод эз тӧждысьлы салдатӧс югдӧдны да культурнӧй мортӧдз воштыны.

Сэсся важ салдатлӧн эз вӧв некутшӧм йитӧд йӧзыскӧд, найӧ вӧлі торъялӧмаӧсь мӧда-мӧдсьыс.

Гӧрдармеечлӧн ӧні дзик мӧд ногса олӧмыс. Гӧрдармееч — сполнӧй праваа сӧветскӧй гражданин. Армияын сійӧ велӧдчӧ, кыдзи колӧ бур олӧм стрӧитны, сэтысь петӧ культурнӧй мортӧн. Гӧрдармеечьяс топыда йитчӧмаӧсь став уджалысь йӧзыскӧд. Йӧзыслы колӧ найӧс вылӧджык пуктыны, тӧдны налысь донсӧ. Медвойдӧр оз ков вунӧдны: гӧрдармеечьяс — Сӧвет государствоӧс дорйысьяс, рабочӧйяслысь да крестьяналысь бур уджсӧ-олӧмсӧ видзысьяс.

Бурджыка видзӧдӧй гӧрдармеечьяс вылӧ! Гӧрдармееч — абу важ кодь салдат.