ПЫР КУТАС ПЕТНЫ
(Нӧшта коми газет йылысь.)

Колян субӧтаӧ миян петіс коми газет. Сійӧ ёна шызьӧдӧма Сыктывкарса йӧзӧс. Быдлаын сы йылысь и сёрни. Кодсюрӧ видӧны: «Мыйла нӧ пӧ «ерундасӧ» лэдзанныд?» Мукӧдыс ошкӧны: «Аттӧ пӧ, бур жӧ газетыд коминад!» Воддзасӧ шуысьясыс — рочьяс да коми кыв увтыртысь коми интеллигентъяс. Найӧ оз кӧсйыны гӧгӧрвоны медколанторсӧ (главнӧйсӧ), мый вӧсна петӧ коми газетыс. Коми газетыс петӧ коми деревняса крестяналы! Найӧ оз гӧгӧрвоны рочнас. Найӧ шоча кывлӧны выль бурторсӧ. Найӧ — пемыд коми уджалысь войтыр, найӧӧс колӧ выль олӧмӧ воштыны коми кывйӧн, коми гижӧдӧн. Со мыйла колӧ коми газетыс! Мукӧд миян кодь посни йӧзлӧн Октябрса революциясянь нин петӧ газетъясыд ас кывйӧн (квайт во). Вотякъяслӧн — «Гудыри». Марилӧн (черемисъяслӧн) — «Йошкар кече», уналӧн. Петӧны дзик ас сёрниа кывйӧн — ӧти роч кыв он аддзы найӧ газетысь.

Кодсюрӧ бара жӧ шуӧны: коми газеттӧ пӧ тіянлысь оз гӧгӧрвоны став коми йӧзыс: ӧтилаын ӧти пӧлӧс сёрни, мӧдлаын — мӧд пӧлӧс; Эжва вожын ӧти ногса, Изьваын — мӧд ногса, Емваын — коймӧд ногса. Сідзи. Дерт, быд ногса сёрни серти газет лэдзны оз позь. Газет петӧ ӧти ногса кывйӧн, шусьӧ литература кывйӧн. Тайӧ кыв серти и колӧ велӧдчыны став комиыслы, тайӧ кыв быдӧнлы гӧгӧрвоана лоӧ. Рочлӧн ӧд сідз жӧ: Сибырын ӧти ногӧн сёрнитӧны, Кавказын — мӧд ногӧн, кӧнкӧ рытывланьын — коймӧд ногӧн, а литература кыв ӧти нога жӧ и быдӧн гӧгӧрвоӧны.

Мед кӧть мый шуасны-а, коми газет пыр кутас петны (ӧні серӧдаӧ да субӧтаӧ быд вежонын, водзӧ, гашкӧ, нӧшта на содас). Веськыда кӧ шуны ӧд, рочыдлы, майбыр, эм лыддянторйыс. Мыйта роч газетыд воӧ — лыддьы сӧмын! А сэтшӧм сикаса коми йӧз, кодъяс кедзовтӧны (оз радейтны) коми кывсӧ, окота кӧ — мед лыддясны, оз кӧ — мед. Шуам тай: коми газетыс, мися, оз налы лэдзсьы. Миянлы зэв нимкодь лоас, деревняса крестяна кӧ кутасны лыддьыны ас кывъя газетсӧ да сы пыр кӧть неуна бурджыка овны велаласны.