КОМИ КРЕСТЬЯНАЛЫ

Став Россия пасьтала талун — май 5-ӧд лун — шусьӧ «Гӧрд гижӧд лун» («День красной печати»). Талунъя лунӧ 1912 воын петіс медводдза номер рабочӧй газет «Правда».

Октябрса революцияӧдз ми, коми йӧз, эгӧ тӧдлӧ газетъяс. Непӧштӧ ми, весиг уна роч йӧзыс эз аддзывлыны газеттӧ. Ӧні быд гырысь карын петӧ газетыд.

Витӧд во нин петӧ газет и Коми муын — Сыктывдін карын «Югыд туй», дай мӧд газет эм Коми муын — Изьваын «Красная Печора».

Мыйла нӧ Сӧвет власьт лэдзӧ сы мында газетсӧ?

Войдӧр став газетыс вӧлі буржуйяс киын, найӧ вӧлі йӧзтӧ ылӧдлӧны, сулалӧны сар дор, попъяс дор да асланыс олӧм дор.

Ӧні Сӧвет власьт тшӧктӧ газетнас югдӧдны уджалысь йӧзӧс, велӧдны, кыдзи колӧ овны да эмбур кыпӧдны.

Миян газетным «Югыд туй» сы туйӧн зэв на лёк. Деревняясӧ этша мунӧ. Сьӧд-пемыд коми йӧзыд омӧля на кутчысьӧ газетад — оз лыддьы.

Ми думайтам да, ёна тані ми асьным (газет лэдзысьясыс) мыжаӧсь: унджыксӧ газетӧ гижам тӧдтӧм кывйӧн — рочӧн. Сэсся этша овлӧ миян газетын крестьяна йылысь гижӧмъяс. Та вӧсна, буракӧ, миян коми крестьяна и оз судзӧдны да оз лыддьыны газеттӧ.

Сӧвет власьт пыр шуӧ: «Газет колӧ лӧсьӧдны сідзи, мед сійӧ вӧлі тӧдса крестьяналы, мед найӧ газетсӧ гӧгӧрвоисны да мед газет вылысь велӧдчисны бурджыка овны».

Ми эськӧ пыр жӧ тӧждысям, мед эськӧ, мися, миян газетным кутшӧмкӧ пӧльза жӧ сетас коми крестьянинлы, мед эськӧ коми крестьяналысь югдӧдыштас жӧ этша синъяссӧ. Сӧмын ӧнӧдз на эгӧ вермӧ ми унатор сетны газет пыр коми крестьянинлы. Миян газетным ичӧт, ыджыдсӧ лэдзны вынным оз судзсьы, — сійӧн и петӧ рочӧн унджыкыс, сійӧн и крестьяна олӧм йылысь этша гижлім.

Ӧнісянь кутам корсюрӧ (вермам кӧ, ӧтчыд недельын) лэдзны «Югыд туй» газет дзик крестьяна йылысь: кыдзи бурджыка видз-му уджавны, кутшӧм законъяс Сӧвет власьт лэдзӧ крестьяна дор, кыдзи сортовка вылӧ либӧ мукӧд удж вылӧ медасьны, кыдзи мӧд местаясӧ овмӧдчыны (переселение), кыдзи велӧдчыны разнӧй прӧмысӧ, — быдтор йылысь, мый крестьянаӧс интересуйтӧ, мый крестьяна оз гӧгӧрвоны. Газет пондам гижны унджыксӧ комиӧн (рочӧн кӧ лоӧ гижӧм, гижам зэв кокньыдик кывйӧн).

Коми крестьяна! Лыддьӧй ассьыныд газеттӧ. Тӧдмалӧй Сӧвет власьт бурджыка, топыдджыка сибӧдчӧй асланыд власьт дорӧ газет пыр!

Сэсся газетлы колӧ тӧдны, мыйджык оз судзсьы крестьяналы, мый йылысь ёнджыка колӧ тӧдны крестьяналы. Мед эськӧ гӧгӧрбок вӧлі бур. Колӧ крестьяналы аслыныс гижны газетӧ, коді кыдз кужас, кодлы мый колӧ, — быдтор йылысь гижам газетӧ.

Тадзи ми вермам бурджыка ӧтувтчыны, велӧдчыны, ӧдйӧджык овмӧс кыпӧдны, регыдджык сьӧкыд нужасьыс мездысьны!