РОЧӦН КӦ ТӦДТӦМ — ВИСЬТАЛАМ КОМИӦН

Ме ог куж и думыштны, мый пыдди лэдзам ми тайӧ газетсӧ? Войдӧр петавліс бура уна гижӧд миян газетын, а ӧні сыысь уна — быд лун петӧ выль газет! Ме казьтыштла корсюрӧ та йылысь, да быдӧн шогӧдас. Лэдзам-лэдзам, гижам-гижам, а быттьӧ водзӧ огӧ и мунӧ. Пыр на важ моз быттьӧ кыссям, некутшӧм пӧльза быттьӧ абу. Некод оз лыддьы, али нӧ мый газетсӧ? Али рочнас дзик ньӧти коми йӧзыс оз тӧд? Часлы нӧ, комиӧн этша висьталам сідзкӧ.

1) Кывлінныд ті, коми войтыр: Волга дорын комын куим миллион (33.000.000) морт тшыгъялӧ, нинӧм сёйныныс абу. Сёйисны: понъясӧс, каньясӧс, крысаясӧс, куйӧд, изӧм мерлина лыяс?..

Кывлінныд ті, коми войтыр: тшыгысла сэні кулӧ лыдтӧм йӧз; шойясыс туплясьӧны туй вылын, гуавтӧг: некод нин найӧӧс — чой кӧть, вок кӧть, мам-бать кӧть, челядь кӧть — оз вермы дзебны?..

Кывлінныд ті, коми йӧз: ӧні сэні тшыг йӧзыс сёйӧны морт шойяс, сёйӧны мӧда-мӧднысӧ ловъя вылысь: мамъяс вундалӧны да пуӧны пияныслысь яйсӧ, ӧти сусед мӧд суседӧс начкӧ да сёйӧ?..

Ме чайта — кывлінныд: важӧн нин ӧд та йылысь мунӧ сёрни (абу сёрни, а кевмысьӧм!)

А ёна-ӧ нӧ ті отсалінныд? Уна-ӧ ті сетінныд Волга дорын тшыглы кулысьлы нянь? Зэв этша, зэв этша!

Сідзи кымын, гашкӧ, отсаланныд, кыдзи тай пожӧгса отсалӧмаӧсь (видзӧд колян нумер газет — 20)?

Яндзим сэтшӧм отсӧгсьыд!

Колӧ отсавны сьӧлӧмсянь! Мед тіян, коми войтыр, некор оз вунлы 1919-ӧд во! Сэки тшыг кулӧмысь миянӧс мездіс Волга дорса йӧз; ӧні найӧ тшыгла кулӧны — колӧ коми йӧзлы мездыны найӧс, сійӧ миян водзӧс!

Тайӧ — медыджыд шог. Тайӧ — медыджыд мог.

2) Тӧданныд ті, коми войтыр: школаясныд тіян кӧдзыдӧсь, песныд абу школаяс дорад. А кодӧс нӧ велӧдӧны школаясас? Тіянлысь жӧ ӧд челядьнытӧ, мед найӧ кужны кутасны бурджыка овны. А мыйӧн ті отсаланныд школаясыдлы да велӧдысьяслы?

Кыдз верманныд — йӧртанныд быдторйӧн да лёка виданныд (видзӧд 14–15-ӧд нумер газет).

Тайӧ — мӧд шог.

3) Кывлінныд ті, коми войтыр (но тайӧс, дерт, кывлінныд!): ӧні мырдӧн тіянӧс удж вылӧ оз нин нуны: лӧсьӧдӧма налог — квайт лун (толькӧ квайт) во гӧгӧр чӧж, а куимсё квайтымын лун асланыд.

Войдӧр вӧлі лун кост мысти нуӧдӧны удж вылад, ӧні вонас толькӧ квайт лун!

Ыджыд кокньӧд тіянлы сетіс Сӧветскӧй власьт, али эз? Зэв ыджыдӧс. Тіянлы, тӧдӧмысь, зэв нимкодь.

Сетӧ жӧ нӧ сідзкӧ и ті ичӧтик кокньӧд асланыд власьтлы — Сӧветскӧй Республикалы: отсалӧй сылы сьӧкыд олӧмсьыс кӧть неуна мездысьны да кок йылӧ сувтны! Сӧветскӧй власьтыд тіян водзын оз на уджа коль.

--------

Огӧ жӧ нин ӧд эськӧ та йылысь первой гижӧ да. Быд газетын та йылысь мунӧ сёрни.

Кӧть эськӧ мед кык-куим коми морт сё морт пытшкысь тайӧс гӧгӧрвоис да висьталіс гӧгӧрвотӧмъясыслы. Мед эськӧ кӧть гоз-мӧд мортлы йиджас сьӧлӧмӧдзыс, кутшӧм шогъяс эмӧсь, дзескыдлунъяс миян Россияын, да кутшӧм кокньӧд уджалысь йӧзлы ӧнія власьтыс мырсьӧ сетны.

Висьталӧй, пармаса олысьяс, коми вокъяс: гӧгӧрвоанныд али онӧ?

Онӧ кӧ гӧгӧрвоӧ — мӧдӧдӧ газетӧ юӧр, сэки выльысь гижам. Сӧмын ӧд пӧраыс уна кольӧ, нюжалӧ, а шогыс ӧтарӧ содӧ... Сійӧ энӧ вунӧдӧй!