ЧЕРАНЬЯС, ГУТЪЯСБом! Бом! Бом! Кывзы пӧрысь, кывзы том, Мойда тэныд, важысянь Кыдзи олӧ пеж черань, Кыдзи олӧ синтӧм гут, И эн вунӧд, юрад кут!* * *Сулалӧ вичко, енъяслӧн поз. Пукалӧ позъяс, ланьтӧмӧн моз Зэв ыджыд черань. Видзӧдныс рам: Грекъясысь полӧ, Кевмысьӧ-олӧ, Рушкуыс зэв шань, Веськыда шуны, тшӧгӧдӧм кукань. Кевмысьысь черань, позйысь кор петӧ Шпыннялӧм сорӧн, везъясьӧ-ветлӧ. Увланьӧ лэччӧ — сьылӧдчӧ-пессьӧ. Позйӧ кор пырӧ, жыннянӧ гора Звӧнитӧ нора, гутъясӧс корӧ.* * *Тилинь-бом! Тилинь-бом! Локтӧ пӧрысь, локтӧ том! Локтӧ ныв и локтӧ зон! Пырӧ позйӧ жеб и том! Тилинь-бом! Тилинь-бом!* * *Синтӧм гутлӧн туй оз быр: Звӧн кӧ кылас, пырысь-пыр Люки-буки позйӧ дзур! Черань дзертӧ деньга гур! Везйӧ шедӧ синтӧм гут. Нярзӧ, корӧ дзоньвидз, шуд; Кевмӧ аслыс мича рай, Личыд, долыд кымӧр сай, Кӧні югыд, кӧні шуд, Абу пемыд, абу руд; Кӧні лоӧ страшнӧй суд, Кӧні вунлӧ тыртӧм куд. — Сэн пӧ сёйнысӧ оз ков. Тилинь-бов! Тилинь-бов! Кывзӧ, муса коми йӧз, Кыдзи кыйӧ черань вез Синтӧм гутлысь ыж да мӧс, Кӧмкот-паськӧм, нянь да грӧш! Черань пычкӧ зарни вир. Сылӧн гортас быд лун пир. Кашкӧ-ветлӧ паськыд вом, Сьылӧ, ворсӧ: тилинь-бом! Дзилим-бом! Билим-бом!* * *Мый нин шуны, муса йӧз, Ёна дзугӧ черань вез! Водзӧ овны сідз оз позь! Колӧ сотны черань поз, Колӧ разьны пежлысь чом, Мед нин волас сылы пом! Сэки оз ков кымӧр сай, Тані воссяс мича рай!
