ВИЛЬЫШ НЫВ

Олӧ-вылӧ вильыш ныв.
Тшӧктӧм-велӧдӧм оз кыв.
Мамыс вильыш нывлы горзӧ,
медым ӧшинь улын ворсӧ.
Сійӧ асьсӧ чайтӧ сюсьӧн:
мамсьыс дзебсясьӧмӧн, гусьӧн
туӧм Эжва дорӧ лэччӧ.
Быттьӧ мырдӧн колӧ сэтчӧ.
Кор нин дзик-дзик пемыд лоас,
вӧлись ворсанінысь воас.

Олӧ-вылӧ вильыш ныв.
Тшӧктӧм-велӧдӧм оз кыв.
Мамыс узьны водны тшӧктӧ.
Сійӧ — сьылігтырйи йӧктӧ.
Ме пӧ артисткаӧн лоа!
Ме пӧ Алла Пугачёва!

Олӧ-вылӧ вильыш ныв.
Тшӧктӧм-велӧдӧм оз кыв.
Мамыс зэв дыр, зэв дыр кывзіс
вильыш нывлысь сьыланкывсӧ.
Весиг ошкис нывсӧ мамыс.
Эм пӧ, эм пӧ сьылан сямыд.
Да вот, шуис, тайӧ пӧрйӧ
колӧ ньӧръявны пӧ ньӧрйӧн.
Кӧть пӧ-й гора нима-ова,
Кӧть пӧ-й Алла Пугачёва,
ставлы мӧрччӧ вӧсни ньӧрйыс.
Ньӧрйыд кывзысьтӧмӧс бӧрйӧ.

Оліс-выліс вильыш ныв.
Ӧні гӧлӧсыс оз кыв.