СЁРМИ

Арся вӧркӧд аддзысьлыны сёрми.
Аддзысьлыны сёрми тӧдса раскӧд.
Медся ёна та вӧсна и норми,
содтӧд сьӧкта, быттьӧ, нуа аскӧд.

Сёрми аддзысьлыны Эжва юкӧд
тӧлысь югӧр улын арся рытӧ.
Любуйтчӧны ӧні сыӧн мукӧд,
мукӧдъясӧс мичыс пӧкӧритӧ.

Сёрми, сёрми. Жугыль октябрь тӧлысь
тӧвланьӧ тай ньӧжйӧникӧн ганьӧ.
Сёрми, сёрми. Уткаяслӧн кӧлысь
сёрмӧмӧн нин лэбӧ шоныдланьӧ...