* * *

Пемыд вой шӧрын садьма да —
			чужӧмӧ рытыв тӧв швичкӧ,
ыджыд пуяссӧ пӧрӧдӧ,
			томъяссӧ му бердӧ личкӧ,
ӧти гудырӧ гудралӧ
			лунсӧ да войсӧ,
гигзьӧ-сералӧ,
			омлялӧ,
					бӧрдӧ да ойзӧ.

Пемыд вой шӧрын садьма да —
			сьӧлӧмын омлялӧ кӧин.
Югыд кодзулӧй усьӧма,
				сотчӧма,
					кольӧма — пӧим.
Пемыд вой шӧрын шевкнитчӧм олӧмыс —
					няня да сола,
сійӧ мичасьыс-мича,
			да вузасьысь лола.

Пемыд вой шӧрын садьма да —
			олӧмыс кок улысь пышйӧ.
Югыд мӧвпъясӧй пышйӧны,
			мӧвпъясӧй — яндысьтӧм шышъяс.
Найӧ кӧин кодь горшӧсь
			да кӧин кодь скӧрӧсь,
лэчыд пуртыс
			и бритваыс —
					ставныслӧн сьӧрысь.