* * *

Войся бобувъяс, нывъяс да томмӧдчысь аньяс.
Войся бобувъяс. Уличьяс. Кодзувъяс. Каньяс.
Войся вуджӧръяс. Кок шыяс. Пельпомъяс. Мышъяс.
Войся бобувъяс. Кодзувъяс. Вуджӧръяс. Шышъяс.

Пуртъяс, вилкияс, тасьтіяс, румкаяс, дозъяс.
Войвыв дзоридзьяс, лунвывса вотӧслӧн розъяс.
Яя-пӧткаа, винаа, чериа, пӧкъя.
Выя няня да вый вылас нӧшта и нӧкъя.

Восьса чужӧма, нималысь, вежӧра, юра.
Сюся, озыра, паськыда, сьӧлӧмсянь, бура.
Босьтӧ, вундалӧ, ырснитӧ, сералӧ, йӧктӧ.
Индӧ, вузалӧ, гусялӧ, малалӧ, тшӧктӧ.

Пася, шляпаа, галстука, дӧрӧма, кӧма.
Аслас керкаа, яхтаа, портфеля, сьӧма.
Водас, кӧсйысяс, шепыштас, ылӧдас, пышъяс.
Войся бобувъяс, кодзувъяс, вуджӧръяс, шышъяс.