СИНЪЯС

Гӧгыльтчӧ шондіыс,
			гӧгыльтчӧ донӧдӧм гӧгыль.
Сынӧдыс онялӧ,
			сынӧдыс чӧскыд да нӧгыль.
Эжваыс дзирдалӧ,
			Эжваыс дэбыдсьыс-дэбыд.
Пӧлясьӧ тӧвруыс,
			тӧвруыс сибыд да небыд.
Верстьӧӧн лоа да —
			синъясӧс куня.
Синъясӧс куня да —
			петкӧдчӧ онялысь юньыс.
Синъясӧс тупка да —
			быттьӧкӧ чужсьӧма выльысь,
быттьӧкӧ шондіа гожӧмыс
			воӧма збыльысь.
Синъясӧс куня да —
			асывнас садьмыссьӧ вонйын,
шондіыс петігӧн, лысъясысь вӧчыштӧм чомйын.
Сьӧлӧмӧй шуда
			и асылыс югыд да мича.
Онялысь олӧмыс ыджыд,
			а шогсьӧмыс — ичӧт.
Синъясӧс куня да видзӧда:
			куима-нёля —
кӧмтӧм да дӧрӧмтӧм,
			дзолясьыс-дзоля —
шонділань котӧрта,
			гожйӧдча.
					Эжваӧ суна.
Синваыс этша да,
			серамыс — уна.
Синъясӧс куня да —
			помӧдзыс видзӧдны кӧсъя:
югдӧма, дзользьӧны пышкайяс, баксӧны мӧсъяс.
Тӧвруыс дурӧ
			да котралӧ потшӧсъяс пӧлӧн.
Пӧльыштас —
			ӧвтыштӧ турунӧн, тшынӧн да йӧлӧн.
Синъясӧс куня да,
			кадыс и олӧмыс сувтӧ:
овнысӧ позьӧ мӧй — помасьтӧг,
				мортыслы — кувтӧг?
Вежнысӧ позьӧ мӧй
			мортыслысь олӧмсӧ, нэмсӧ —
лоӧмсӧ, бырӧмсӧ, индӧмсӧ, абусӧ, эмсӧ...