КЫДЗЛӦН ВЕЖӦДӦМА ЧАЛЬ

Му вылас, ва вылас кольмӧдан кӧр,
Ӧдвакӧ морӧсад тӧрас.
Пыралан гортӧ и петалан бӧр —
Чуксалӧ гудӧка нӧрыс.

Кыдзлӧн вежӧдӧма чаль,
Еджыд быгъя льӧмйыс йӧрын.
Шлывгӧ дзоридзьяса шаль
Сьӧлӧм шӧрсянь сьӧлӧм шӧрӧ.

Югзьӧдны ывласӧ, майбыр, оз ков —
Кыаыс кыаӧдз нуас.
Видзӧдлан синмӧ, — и ымралӧ лов,
Пышъялӧ кок улысь муыс.

Ӧмидзӧн мавтӧма вӧрыслысь йыв,
Эскылам тэкӧд вай бурас.
Шуны зэв окота сы мында кыв,
Медым кӧть ӧтиыс сюрас.