ШОГ СЬЫЛАНКЫВ

Коръясис тай эськӧ пуыс,
Туис эськӧ Эжва ю.
Сӧмын мусук ылӧ муніс,
Весиг кыв ни джын эз шу.

Еджыд быгйыс льӧмлӧн лэбзис,
Купальнича петіс — виж.
Кытчӧ мусук менам дзебсис?
Мыйкӧ нинӧм тай оз гиж.

Гожӧм воліс, арыс колис,
Мусук гӧлӧссӧ оз сет.
Ӧти зон мен тӧрыт долис:
Вай пӧ ме сайӧ тэ пет.

Сӧмын виччысьӧ тай сьӧлӧм
Муса зонмӧс лун и вой.
Кор нин коляс кӧдзыд тӧлыс?
Код нин кутлас менсьым сой?