МОНЬЯС

Юкмӧс дорын таво арся моньяс...
Сёрниттӧмыс нинӧм дзик оз коль.
Пелысь вывсянь кыа зобъя жоньяс
Гылӧдӧны налы сикӧтш моль.

Ӧні эм на сикӧтш новлан кадыс:
Пач вом дорысь энька эз на кеж,
Эз на торксьыв олан-вылан ладыс,
Эз на пансьыв керка пытшкын теш.

Эз на некод голя вылӧ тувччы,
Эз на некод омӧль кывйӧн ёр,
Оз на некод бӧжас налы кутчысь,
Оз на некод сёйны налысь кор.

Оз на верӧс абутӧмсӧ пычкы,
Оз на бӧртӧм тяпи пыдди видз.
Натӧг мунӧ олӧмыс на кыдзкӧ,
Корӧ сӧмын петкӧдлыны мич.

Юкмӧс дорӧ ылалісны моньяс,
Сёрниттӧмыс нинӧм дзик оз коль.
Пелысь вывсянь кыа зобъя жоньяс
Гылӧдӧны налы сикӧтш моль.