ВУДЖАНІН

«Вуджанінын вӧвъясӧс оз вежлыны», —
Шулӧмаӧсь рочӧн коркӧ йӧзыс.
Кыдз он веж, кор бокӧ найӧ кежӧны,
Мудзӧмаӧсь, кольӧма куш грӧзыс?

Кыдз он веж, кор ваас пырны полӧны,
Кокныс быдсӧн коньӧръяслӧн тірӧ?
Юсӧ вуджны бурджык вӧвъяс колӧны,
Мед эз кыскы горувджыкса йирӧ.

Вай жӧ вежам этшысь петӧм вӧвъяссӧ,
Со тай мыйта йирсьӧ матын вӧлыс.
Вай жӧ налы пуктам повод кӧвъяссӧ,
Лючки-бура вуджам мӧдлапӧлӧ.