ВАБЕРГАЧ

Коркӧ Енмӧн чайтім,
Коркӧ шулім бурӧн.
Талун лякам няйтӧн,
Шуам выжыв юрӧн.

Мынім, шуам, гадысь,
Быттьӧ быдтор тӧдам.
Ставсӧ кольӧм кадысь
Аддзам сӧмын сьӧдӧн.

Талун енэж лӧзыс
Сьӧлӧм оз жӧ бурмӧд.
Кӧнсюрӧ со йӧзыс
Ӧвсьӧм пыдди дурмӧ.

Муным — мыйта колӧ,
Но ог тӧрӧй — дзескыд.
Турки-тарки олам,
Нинӧмӧ ог эскӧй.

Эрдӧ петӧм пыдди
Быттьӧ джуджыд гуын.
Вабергачӧ быттьӧ
Кылӧдӧма юыс.

Гӧгралам ми сэні,
Воим ставным пикӧ.
Ёрӧма тай Енмыс,
Тыдалӧ, нин дзикӧдз.

Эбӧс чӧжны колӧ —
Вабергачсьыс петны.
Кодъяслыкӧ долыд,
Кинысӧ оз сетны.