НЭМ

Абхазияын, телевизор висьталӧ,
Сё воысь дырджык весиг йӧзыс олӧны.
Оз чорыд водка чашкаясӧ кисьталӧй,
А гӧститнытӧ чай юигмоз волӧны.

А Войвыланым, миян парма-егырын,
Зэв этшаӧн на сёясӧдзыд волӧны.
Век водза-водзсьыс кусыньтчӧны мегырӧн,
Зэв уна вылӧ сизимдасӧдз олӧны.

Тан вывті ёна уджыс мортсӧ жугӧдӧ,
Дзик ставсӧ вӧчны татчӧс йӧзыс туйӧны:
И фермаясад мунӧны лӧз югыдӧн,
И вӧрын тӧвнас лымйӧд коскӧдз уйӧны.

И кылӧдчигӧн йиа ваын болскӧны,
И страдна вылӧ пӧсьсӧ кисьтны петӧны,
И шахтаясын ӧзъян изтӧ колскӧны,
И нефтьтӧ-газтӧ Рӧдиналы сетӧны.

А сэсся томсянь больничаӧд ветлӧны,
А сэсся томсянь дзормӧны да рушмӧны.
Путёвка налы лунвывъясӧ сетлӧны,
Но тӧлкыс абу, гӧгӧр кӧ нин кушмӧма.

Тат дӧмас врач, а сэті бара письтӧма,
И гашкӧ, бурджык кулыштны и колӧ нин...
Абхазияын, телевизор висьталӧ,
Сё воысь дырджык весиг йӧзыс олӧны.