КӦИН

Тшыг кӧин йӧзысь омӧля нин поліс
И сиктӧ войнас гусьӧникӧн воліс.
Тан коркӧ важӧн вӧчліс сійӧ пир —
Кык мӧслысь юис пӧттӧдз шоныд вир.
И ӧні бара ферма дорӧ муніс,
Мед бара пӧттӧдз шоныд вирсӧ юны.
Но ферма пытшкас вӧлі шы ни тӧв —
Сэн ловъя лолыс некоді эз вӧв.
Кысь тӧдны сылы, скӧтыс абу мый,
Оз вӧчны важӧн йӧв ни нӧк, ни вый.
Мый виддзыс-муыс баддьӧн-роскӧн тырис,
Мый сиктыс ачыс регыд дзикӧдз бырӧ.
Но кӧин сюсь и омлявны эз кут,
И, сідз кӧ шуны, аддзис ассьыс шуд:
Чом пытшкысь понйӧс узянінсьыс суис
Да лапъя пельӧс пияныслы нуис.