ОШ

Чужан сиктӧд ветлӧ ош
Арся пемыд войӧ.
Татчӧ велаліс — эз вош,
Скӧтӧс начкӧ-сёйӧ.

Ректӧм вӧрӧ пув эз пет,
Со и сиктӧ пырис.
Плешкас некоді оз сет —
Кыйсьысь важӧн бырис.

Оз ӧд усьӧм гача дед
Чергӧд вельмӧм зверӧс.
Да и сійӧс вины мед,
Абу пуртыс-черыс.

Оз ӧд кысян емнас баб
Ошлы синмас заргы.
Да и дӧбельки нин слаб,
Паччӧр вылын няргӧ.

Чужан сиктӧд ветлӧ ош,
Скӧтӧс начкӧ-сёйӧ.
Сэсся вежӧрсьыд кӧть вош —
Ойя жӧ дай ойя!