ИССЫК ТЫ ДОРЫН

Казахстанын, изъя гуын,
Ты эм, шуӧны Иссыкӧн.
Ваыс вежов козъя дзуысь,
Коді енэжсӧ нин пыкӧ.

Матын видз, и сэні керка
Ӧшиньяснас луна банӧн.
Йӧзлӧн висьталӧмъяс серти,
Овлӧма Куратов тані.

Морӧс висьӧм жмитӧм бӧрас
Лолалӧма кӧра сынӧд,
Видзӧдӧма лымъя гӧра,
Содтысьӧма олан вынӧн.

Татчӧ волігӧн ми кылім
Сылысь коми кывъя гӧлӧс.
Мыйӧн кывбуръяссӧ сьылім,
Быттьӧ чужан муын вӧлім.

Макъяс ыпъялӧны вӧлі
Гӧра подулын и костын.
Быттьӧ коми пилӧн сьӧлӧм —
Аслыспӧлӧс, лунся востым.