УЧИТЕЛЬНИЦА

Челядь кодь на ачыс,
Кызьӧс он на сет.
Киас эськӧ чача,
Ворсыштіс на мед.

Сӧмын ӧні сылӧн
Ӧти шуд да шог —
Быд лун урок вылӧ
Мунны сылӧн мог.

Грездлӧн гажтӧм баныс,
Абу тӧдса морт.
Но ӧд лоас тані,
Чайта, сылӧн ёрт.

Йӧзыс матыс лоас,
Мусмас видз и вӧр.
Кадыс мунны воас, —
Кӧть эн вӧрзьы бӧр.

Вермас лоны, ваяс
Сійӧс татчӧс зон.
Чайта, лоас тайӧ —
Оз на узьны тон.

Но а талун нылыс
Гижис гортас тадз:
«Кӧдзыд ывла вылын,
Ломта ме кӧрт пач.

Гажтӧма зэв ола,
Челядькӧд кӧть пыр.
Эштанныд кӧ, — волӧй,
Аслым — зэв на дыр».