РЫТ ПУКӦМ

Дарья важӧн ӧтнас олӧ,
Чунь кодь ӧтнас дзик.
Сы дорӧ и пукны волӧ
Рытсӧ миян сикт.

Сёрнитӧны баба чукӧр,
Кӧні, мый да кор.
Нинӧм рытывбыд он шу кӧ,
Кутшӧм нӧ тэ морт?

Тюргӧ ваыс самӧварысь,
Часі — тіч да точ...
Гӧтырсӧ пӧ вайис карысь,
Дзик пӧ сійӧ роч.

Пиӧй гӧститны пӧ корис,
Оз пӧ волы врач.
Няньыс шогмытӧм пӧ чорыд,
Сёйлім пӧ и кач.

Кодкӧ кыӧ, кодкӧ вурӧ,
Ставлӧн легӧ ки.
Довкйӧдлӧны унзіль юрӧн,
Кытчӧдз ӧзйӧ би.

Дыш и быттьӧ гортӧ мунны,
Кольны шоныд жыр.
Но ӧд воас, кӧнкӧ, луныс,
Оз на, кӧнкӧ, быр.