ТЬӦЩА

— А тэнад юрыд абу вӧлӧм тӧщӧ,
И бура аддзӧ, тыдалӧ, и син, —
Тадз шуис первой аддзысьлігӧн тьӧща
Да вайис меным ыпъялысь на блин.

Дерт, сійӧ аддзис, мый ме абу урӧс,
Но, чайта, лэптіс аслас нывлы дон:
Со кутшӧм лӧсьыд ныв пӧ тэныд сюрис,
А ачыд — код на тӧдас кутшӧм зон.

— Да, — шуа ӧні, вояс кольӧм борын, —
— Збыль абу вӧлӧм пилипызя юр:
Саревна сюрис меным сьӧд вӧр шӧрысь,
Ог чайт, мый кодкӧ гӧтырысь на бур.

А тьӧща блинсӧ пиянлы нин вайӧ
Да шуӧ меным: «Тэ кодьӧсь жӧ дзик».
А ачым аддза: мамныс кодьӧсь найӧ,
И мекӧд ӧти кывйӧ воӧ сикт.